Charter Document - 03410155

Omnibus Cristi fidelibus hanc litteram visuris vel audituris Henricus miseratione divina London episcopus eternam in Domino salutem Vacante nuper ecclesia de Borham nostre diocesis per resignacionem discreti viri magistri Thome Eswy canonici ecclesie nostre eodemque nostro se committente ordinacioni super status sui indempnitate nos attendentes sui corporis inbecillitatem ac senium volentesque eiusdem expensas necessarias cum honoris sui decremento non diminui taliter de dicte ecclesie proventibus duximus ordinandum Videlicet quod vicarius dicte ecclesie qui pro tempore fuerit solvat decano et capitulo sancti Pauli London quadraginta et quinque marcas de dicte ecclesie proventibus annuatim quamdiu predictus magister Thomas vixerit terminis subscriptis videlicet in crastino dominice qua cantatur Letare Ierusalem viginti et duas marcas et crastino sancti Iohannis Baptiste viginti et tres marcas Dicti vero decanus et capitulum eisdem terminis totam dictam pecuniam predicto magistro Thome sine omni fraude et dilatione suo solvant perpetuo Et residuum dicte ecclesie proventuum dictus vicarius ad suam sustentacionem integraliter convertet Dicto vero Thoma decedente idem vicarius omnes dicte ecclesie obvenciones ad suos usus integre percipiat solvendo tamen decano et capitulo sepedictis viginti et quatuor marcas secundum quod in alia ordinatione a nobis super dicte ecclesie proventibus facta plenius continetur Iurabit autem vicarius antedictus per nos in eadem vicaria instituendis quod hanc nostram ordinacionem in omnibus fideliter observabit In cuius rei testimonium presentes litteras sigillo nostro duximus roborandas Dat die veneris proxima post festum beati Michaelis anno domini millesimo ducentesimo sexagesimo tercio et pontificatus nostri primo