Charter Document - 03410135

Universis Cristi fidelibus ad quos presentes littere pervenerint H miseratione divina London episcopus salutem in domino Mota olim questione coram officiali nostro aliquando et postea coram commissario nostro per magistrum Godefridum rectorem ecclesie de West Thurrok nostre diocesis super duabus partibus decimarum maiorum provenentium de dominico quod fuit quondam patris domini Henrici de Heluton militis quas quidem decimas idem rector petebat a Nicholao de Leg ipsas percipiente tanquam de iure communi ad dictam ecclesiam suam spectantes ita quod dictum dominicum est infra parochiam dicte ecclesie religiosis viris priori et conventu Lewens asserentibus dictum N dictas decimas ad ipsos et ecclesiam suam iure speciali pertinentes nomine ipsorum percepisse predictisque partibus scilicet rectore Nicholao priore et conventu expresse et absolute se ordinationi nostre subponentibus in predictis In nomine patris et filii et spiritus sancti Nos discordantes ad pacis concordiam volentes reducere predicte litis materia prorsus perpetuum amputata et indempnitati utriusque ecclesie scilicet de Lewes et de West Thurrok prospicere cupientes summarie huiusmodi negotio examinato de capituli nostri et aliorum iurisperitorum consilio salubriter duximus ordinandum et ordinamus videlicet quod dicti rector et successores sui in perpetuum nomine predictorum religiosorum dictas decimas percipiant et ad perpetuam firmam ipsas teneant et habeant sine aliquo impedimento et contradictione reddendo annuatim eisdem religiosis vel eorum certo procuratori apud dictam ecclesiam de West Thurrok quadraginta solidos annuatim viginti solidos in octabis sancti Michaeli et viginti solidos in octabis Pasche absque omni dilatione et cavillatione ad cuius etiam pecunie solutionem singulis annis et singulis terminis faciendam dicti rectores per nos et officialem nostrum et etiam successores nostros et eorum officiales sola monitione premissa auctoritate pontificali facta per sententias suspensionis et excommunicationis et etiam sequestrationem fructuum dicte ecclesie si necesse fuerit compellentur et ad dampna et expensas que vel quos dicti prior et conventus incurrerint occasione dicte pecunie suis terminis non solute super quibus dampnis et expensis credatur simplici verbo dictorum prioris et conventus vel eorum procuratoris Hanc vero ordinationem partes predicte acceptarumt que sigillo nostro et sigillis partium roborata penes utrumque partem residet cum confirmatione capituli nostri super hoc facta Actum apud London mense Decembris anno domini MCCLX primo