Charter Document - 03410117

Notum sit omnibus presens scriptum visuris vel audituris quod anno regni regis Henrici filii regis Iohannis tricesimo tercio in festo Nativitatis sancti Iohannis Baptiste dominus Fulco Basset London episcopus vendidit domino Hugoni de Ver comiti Oxonie custodiam terre Alicie filie et heredis Gileberti de Saunford una cum maritagio eiusdem Alicie quam quidem custodiam cum maritagio idem dominus episcopus habuit de venditione et concessione domini regis per mille marcas eidem solvendas ad scaccarium et centum marcas pro auro regine Qui quidem comes nono decimo die Iulii eiusdem anni personaliter comparuit coram baronibus de scaccario et dictam venditionem ratam habentes expresse sponte et absolute se fecit inrotulari debitorem domini regis loco ipsius episcopi de assensu ipsius episcopi assumens in se totum onus et periculum ipsius debiti mille marcarum in quibus dictus episcopus domini regis tenebatur ratione predicte custodie et maritagii et centum marcarum pro auro regine Promisit etiam expresse pro se et heredibus suis vel quibuscumque successoribus se dictum episcopum conservaturum indemne et observaturum terminos per finem suum factum a domino rege et regina eidem episcopo concessos Promisit etiam idem comes coram baronibus et convenit inter dictum comitem et prefatum episcopum quod ipsa Alicia maritaliter Roberto filio dicti comitis primogenito et heredi Et si forte de ipso Roberto quod absit humanitus contigerit custodia totius terre ipsius Alicie remanebit predicto comiti vel assignatis suis usque ad plenam et legitimam etatem ipsius Alicie et interim maritaliter per eundem comitem vel assignatos suos et per consilium predicti domini episcopi et aliorum propinquorum parentum et amicorum ipsius puelle Alicie habenti quingentas libratas terre ad minus nisi fuerit de consensu eorundem parentum et amicorum alicui qui minus habeat propter sui corporis bonitatem et generis nobilitatem hoc tamen salvo quod in voluntate eiusdem episcopi sit solvere eidem comiti vel assignatis suis quadringentas marcas pro maritagio eiusdem Alicie et ipsum maritagium ad ipsum episcopum libere revertatur quandocumque voluerit vel ad dictum Philippum fratrem suum si de ipso humanitus contigere Et si predictus Philippus noluerit vel de ipso humanitus contigerit predictum maritagium vel potestas maritandi dictam Aliciam transeat ad propinquiores parentes ex parte matris ipsius Alicie solutis tamen dicto comiti vel suis assignatis quadringentis marcis Voluit autem et concessit memoratus comes quod predictus Robertus filius suus desponsat dictam Aliciam et ducat eam in uxorem legitimam et quod filii et filie ex ipsis procreandi heredes sint totius terre et hereditatis eiusdem comitis Dictus vero episcopus promisit fideliter eidem comiti quod illius custodie et maritagii vendicionem et etiam tradicionem quam eidem fecit tam terre quam dicte Alicie cum omnibus pertinenciis que accidere possint ratione dicte custodie secundum quod ea a domino Henrico rege Anglie filio regis Iohannis habuit iuxta leges et consuetudines regni contra omnes homines warantizabit Et dictus comes fructus inde percipiet cum omni proficuo a die dominica proxima ante dictum festum sancti Iohannis Baptiste Et ad hec fideliter observanda dictus episcopus promisit in verbo sacerdotis ex parte sua se observaturum et dictus comes ex parte sua sub eodem forma corporale prestitit sacramentum In cuius rei testimonium utraque pars presenti scripto in modum chyrographi confecto sigilla sua alternatim apposuit