Charter Document - 03410113
| Charter Number: | 03410113 |
|---|---|
| Cartulary Title: | London 1229-1280 Volume 38 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1250 |
| Date type: | Assigned |
| Resource Link(s): |
|
Charter:
Viris venerabilibus et amicis in Cristo carissimis I dei gratia abbati sancti Albani et eiusdem loci conventui ac omnibus aliis eidem domui subiectis F divina permissione London episcopus salutem et sincere dilectionis in Domino semper augmentum Fama gradu multi vago terram perlabitur que stateram minatur communis iudicii et edictum novelli discriminis in pluribus locis disseminat pace quidem diu diutina nostre diocesis per patrem nostrum venerabilem archipresulem impugnata via credimus iuste defensionis arrepta tanquam vestrum bellatores pro iure omnium et singulorum provincie in fortune area premissi bellum nobis impositum nisi omnipotentis et vestri concilii solatio respiremus adiuti vobis predicimus acrius imponendum Idem namque dominus quod forte vobis innotuit visitationem totius cleri et populi nostre diocesis ac procurationem exigens ab eisdem a capitulo nostro primitus ac iterum a duobus prioratibus civitatis contradictionem passus pariter et repulsam licet curialem prius in ipsos ipsum ad premissa non admittentes secundo pro eo quod aliquibus nostre ditionis ne ipsum in preiudicium ecclesie nostre admitterent mandavimus in personam nostram excommunicationis sententias fulminavit legitimis tamen appellationibus preventas causis iustis veris et probabilibus expressis Nec hac inquiete sola quietem nostram aggrediens immo sententias sic derivatas in sua diocesi et ut fertur alibi fecit publicari Missis igitur ad curiam iam procuratoribus quosdam coepiscopos nostros super premissis sumus allocuti qui iura sua et libertates magnanimitate assumpta pretendunt defendere Quocirca dilectionem vestram duximus exorandum quatinus causam huius petitionis ac honorem vestrum et indempnitatem considerantes nulla tepescat probitas nulla frigescat virilitas sed in ipso ponentes fiduciam qui iniustorum iniuria tuetur oppressos manum nobis velitis porrigere consilii salutaris Valeat universitas vestra semper in Domino