Charter Document - 03410102
| Charter Number: | 03410102 |
|---|---|
| Cartulary Title: | London 1229-1280 Volume 38 |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1248 |
| Date type: | Internal, Feast, A.D., Episcopal |
| Resource Link(s): |
|
Charter:
Anno domini millesimo ducentesimo quadragesimo octavo cum dominus Fulco London episcopus decimas de dominico Gileberti filii Henrici in parrochia de Halsted sitas optinuisset de abbate et conventu de Flay et ex dono ipsorum easdem libere possideret ad disponendum de ipsis pro voluntate sua convenit inter episcopum prefatum Henricum decanum et capitulum ecclesie beati Pauli London ex parte una et Mauricium et Thomam rectores ecclesie de Halstede nomine ecclesie sue ex altera quod iidem Mauricius et Thomas et successores sui futuri rectores ecclesie memorate teneant predictas decimas ad firmam perpetuam pro decem solidis sterlingorum per annum quos solvent prefatis decano et capitulo medietatem scilicet ad Natalem domini et aliam medietatem in septimana Pentecost ad dispensandum secundum quod idem episcopus per scripturam suam distinxit illos simul cum aliis dispensari Et si in solucione alicuius termini defecerint non solventes infra septimanam proximo sequentem dabunt quinque solidos nomine interesse et sic pro singulis septimanis in quibus defecerint consimilem penam reportabunt Et predicti Mauricius et Thomas pro se et successoribus suis cuilibet appellacionem constitucioni de duabus dietis edite in concilio generali fori privilegio et omni alii iuris remedio renuntiarunt adeo quod episcopus qui pro tempore fuerit et predicti decanus et capitulum possint ipsos et successores suos si in solucione defecerint in parte vel in toto convenire coram quocumque iudice vel liceat episcopo et dictis decano et capitulo si magis hoc elegerint excommunicare ipsos propria auctoritate et detinere excommunicatos quousque tam de principali satisfecerint quam de pena Et prefati Mauricius et Thomas iuraverunt et omnes sucessores sui similiter iurabunt tactis sacrosanctis ewangeliis quod omnia et singula supradicta firmiter et fideliter observabunt Et ne premissa in posterum veniant in dubium et ut rectores ecclesie de Halstede pacifice possidere valeant decimas prefatas cum omni integritate sine reclamacione cuiusquam episcopus memoratus decanus et capitulum pro se suisque successoribus Mauricius autem et Thomas prefati nomine ecclesie sue pro se suisque successoribus presentium testimonio in modum cyrographi dupplicato et mutua sigillorum suorum apposicione convencionem prefatam roborarunt Act London apud sanctum Paulum in festo sancti Thome apostoli anno domini MCCXL octavo consecracionis ipsius domini Fulconis anno quinto