Charter Document - 03410100

Noverit universi quod orta quadam contentione inter dominum Fulconem episcopum London et capitulum suum sancti Pauli London super modo tenendi et observandi divisionem inter parcum dicti domini episcopi de Clakinton et boscum capituli pertinentem ad manerium suum de Thorpe super feris silvestribus episcopi habendis in predicto bosco capituli quando contigerit illas ingredi predictum boscum ita convenit inter eos quod capitulum sumptis propriis faciet fossatum ubi aqua defluit inter predictum parcum et boscum ad latitudinem in quinque pedum aut plus ita quod predicte fere possint libere transilire ad veniendum et ingrediendum boscum capituli et proicietur terra que debet educi de fossato ex vtraque parte ripe tam super partem ripe versus terram episcopi quam versus ripam bosci capituli et per fundabit capitulum dictum fossatum quantum voluerit Licebit etiam capitulo facere sepem iuxta ripam versus boscum suum si voluerit altitudine usque ad genua hominis que tantum distabit a ripa quod dicte fere episcopi non impediantur per sepem quem transire possint ad boscum capituli Premissum autem fossatum et sepem faciet capitulum quotiens voluerit et expedit illud facere per fundare eodem modo ita quod alia animalia domestica non possint transire hic vel illuc Si vero fere dicti episcopi impediantur transilire ad boscum dicti capituli propter altitudinem sepis vel latitudinem fossati predictum capitulum huiusmodi impedimentum ad mandatum episcopi per visum proborum et legalium hominum ipsius patrie amovebant Convenit etiam quod idem capitulum claudet palatio vel sepe boscum suum adeo bene sicut episcopus claudit parcum suum ita scilicet quod per defectum clausure per illam parcum non exeant dicte fere episcopi scilicet adeo bene ex parte dicti bosci includantur sicut ex parte parci episcopi In cuius rei testimonium dictus episcopus et capitulum huiusmodi scriptis in modo chirographi confectis sigilla sua apponi fecerunt Datum anno domini MCCXLV quarto mensis Ianuarii