Charter Document - 03409364

Universis Cristi fidelibus presentes litteras inspecturis Iohannes permissione divina Cantuar ecclesie minister humilis totius Anglie primas salutem et sinceram in domino caritatem In edificio ecclesie Anglicane permittente omnium artifice sapientia gerentes licet inmeriti et indigni officium architecti iuxta gratiam celitus nobis datam sollicite circumspicimus ut valemus ne in tam reverende fabrice structura ruine locus pateat ne divulsa contignatio pereat et precipue ne quevis occasio columpnas illas concutiat que nobis cum habent tanti tecti pondera supportare Huius igitur officii debito conscientie nostre oculum stimulante et excitante clamore celebri qui ex facti evidentia duxit originem ad partes venerabilis Salesbyrien[sis] ecclesie nostre suffraganee accedentes invenimus ut prevolans fama docuerat honorabilem virum dominum Robertum fratrem nostrum dei gratia ipsius ecclesie episcopum emerite militie decursis laboribus debilitate corporis et senectutis incommodis pregravatum visus etiam corporei solatio destitutum cuius ministerio habet pastor ecclesie vultus suorum pecorum precipue experiri Et quia coadiutoris ei remedium esse necessarium vidimus evidenter interpositis tractatibus variis tandem cum predicto episcopo et eiusdem loci capitulo reali compositione convenimus in hac forma Videlicet quod in presentiarum et futuris temporibus quotiens aliquem Salesbyrien[sem] episcopum decidere contigerit in languorem seu debilitatem quamcumque pro qua secundum canonicas sanctiones ei dari debeat coadiutor episcopus ipse si mentis compos extiterit habens animi iudicium concurrente consensu capituli sui et si forsan episcopus animi iudicio privatus fuerit [decanus si superstes fuerit] ac presens in Cant provincia et capitulum predicti alioquin capitulum ipsum per se eligent duos vel tres de gremio ipsius ecclesie viros honestos in spiritualibus et temporalibus circumspectos quos ad hoc reputaverint ydoneos de quo eorum conscientias oneramus sicut volunt coram Cristi facie in tremendo iudicio respondere et sic electos nominabunt nobis et successoribus nostris pro tempore sede plena et eadem vacante religiosis viris priori qui pro tempore fuerit et capitulo ecclesie Cristi Cantuar vel soli capitulo si vacet etiam prioratus Et nos ac successores nostri sede plena et eadem vacante dicti prior et capitulum unum de taliter nominatis de quo secundum deum magis viderimus expedire sine difficultate qualibet coadiutorem dabimus episcopo taliter egrotanti vel debilitati huiusmodi subiacenti Et hic coadiutor habeat potestatem in administratione spiritualium et temporalium quam ei concedunt canonice sanctiones Ante cuius executionem officii prestet corporale quicumque fuerit iuramentum coram nobis aut successoribus nostris seu priore et capitulo predictis sede vacante de coadiutoris officio fideliter exercendo Et quandocumque contingat episcopum animi carere iudicio vel mentis alienationi continue subiacere non intendimus presenti ordinatione nostra capituli iura ledere aliqualiter in hiis que spectant ad beneficia conferenda Preterea si contingat processu temporis coadiutorem huiusmodi cedere vel decedere vel in administrationis officio taliter se habere quod de iure sit merito ammovendus vel alias impediri ne possit huiusmodi sufficienter vacare officio ipso ammoto sine more periculo alii sub eadem forma per episcopum et capitulum eligantur et nobis et successoribus nostris vel priori et capitulo Cant sede vacante illico nominentur ut unus ex ipsis in prefata forma detur absque omni dilationis tedio coadiutor Si vero episcopus languens aut debilis cum suo capitulo in casu huiusmodi vel capitulum ipsum solum in casu quo ad ipsum huiusmodi pertinet electio postquam de infirmitate vel debilitate talis pontificis constiterit utpote cum sit notorium aut legitime declaratum per duos menses in electione huiusmodi facienda et presentanda extiterint negligentes ex tunc licebit nobis et successoribus nostris archiepiscopis sede plena vel priori et capitulo predictis vacante sede Cant coadiutorem aliquem ydoneum de gremio Salesbyrien[sis] ecclesie auctoritate nostra seu ecclesie nostre dare prout ipsius episcopi necessitati et ecclesie sue utilitati viderimus expedire Et ut coadiutor ad sui executionem officii devotius accendatur ordinamus ut ei de bonis episcopalibus per nos et successores nostros seu priorem et capitulum Cant de consilio Salesbirien[sis] capituli stipendium rationabile assignetur In cuius rei testimonium sigillum nostrum presentibus duximus apponendum Datum apud Bramston xii kalendas Martii anno domini millesimo ducentesimo octogesimo secundo consecrationis nostre tertio