Charter Document - 03400448
| Charter Number: | 03400448 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1293 |
| Date type: | Internal, A.D., Calendar, Episcopal |
| Resource Link(s): |
|
Charter:
Nicholaus dei patiencia Sarr episcopus dilecto in Cristo filio domino Galfrido de Turbelvile militi ac dilecte filie Isabelle uxori eiusdem militis salutem gratiam et benediccionem Exhibita nobis vestra peticio continebat ut quod in manerio vestro de Esthenreth capellam in qua vos et libera familia vestra audire divina possitis ac proprium sacerdotem absque matricis ecclesie preiudicio in capella ipsa pro animabus vestris et progenitorum vestrorum ac omnium fidelium defunctorum celebraturum perpetuo habere valeatis ad cuius sacerdotis exhibicionem seu sustentacionem decimas tam maiores quam minores de manerio ipso de Esthenreth annuatim provenientes que ad vestram et progenitorum vestrorum presentacionem ab olim spectabant per nos assignari petistis vobis concedere dignaremur de nostra gratia speciali attendentes siquidem quod in hiis que nostro et ecclesie nostre profectui conveniunt et honori tam vos quam progenitores vestri promti iugiter existitis ac volentes propter hoc et alia vos speciali prerogativa favoris in quantum cum deo possumus prevenire ut capellam in prefato manerio vestro habere ac sacerdotem in ipsa perpetuo celebraturum de prefatis decimis sustinend[um] et exhibend[um] ut premittitur quas decimas ipsi capelle pro sustentacione sacerdotis ibidem celebraturi de assensu capituli nostri per presentes annectimus vobis ac successoribus vestris eiusdem manerii de assensu prefati capituli nostri graciose duximus concedend Ita tamen quod quo ad oblaciones aut alios ecclesiasticos proventus ecclesie matrici nullum preiudicium fiat omnino Volumus quoque quod sacerdos in capella ipsa ministraturus quilibet successive post alium nobis et successoribus nostris presentetur et per nos et successores nostros instituatur cum habilis et instituendus existat et quod in admissione sua corporaliter iuret quod oblaciones ad capellam ipsam provenientes seu proventuras ac omnia alia salvis decimis predictis capelle assignatis ecclesie matrici integraliter postquam ea receperit illico restituet Iurabit etiam nichilominus ipsi rectori qui pro tempore fuerit obedienciam manualem nullumque parochianum suum in dicta capella admittet ad aliquod sacramentum nisi de libera familia militis fuerit supradicti nec ecclesie matrici ullum omnino preiudicium seu dampnum fieri procurabit aut pro viribus suis fieri permittet In cuius rei testimonium et memoriam perpetuam futurorum tam sigillum nostrum et sigillum capituli nostri quam sigillum ipsius militis huic scripto ad modum cirograffi confecto alternatim sunt appensa salvis in omnibus iure et dignitate et honore nostro et successorum nostrorum ac statu ecclesie nostre Sarr quibus non intendimus derogare Dat apud Wodeford tercio kl Aprilis anno gratie millesimo ducentesimo nonogesimo tercio et consecracionis nostre secundo