Charter Document - 03400444

Excellentissimo principi et domino suo reverendo domino Edwardo dei gratia regi Angl[ie] illustri domino Hibern[ie] et duci Aquit[anie] Nicholaus eiusdem patiencia Sarr ecclesie minister humilis salutem in eo per quem reges regnant et principes dominantur Maiestati regie tenore presencium innotescat quod cum Elvardus de Salso Marisco clericus coram discretis viris dominis Roberto Malet et sociis suis iusticiariis ad gaolam Rading deliberandum assignatis super crimine furtis homicidii et quibusdam aliis criminibus tunc temporis accusatus nobis secundum consuetudinem regni Angl[ie] pro iure ecclesiastice libertatis servando pro eo quod clericus fuit et est liberatus iudicio ecclesiastico pertractandus idem Elvardus super eisdem criminibus manu sua et manibus decem et octo con purgatorum suorum ordinis sui quorum etiam aliqui in ordinibus superioribus constituti fuerant et con purgatores omnes persone note bone fame et omni excepcione maiores extiterant coram nobis canonice se purgavit propter quod prefatum Elvardum sicut oportuit a criminibus huiusmodi super quibus nobis liberatus extitit iudicio ecclesie pertractandus immunem esse pronunciavimus et pronunciamus ac quietum omnino ipsum sue bone fame exigente iusticia restituimus regie maiestati humiliter supplicantes quatinus ipsum Elvardum sub defensione pacis regie favore benivolo collocantes terras et tenementa bona et catalla que sub districtu vestre celsitudinis occasione dicti criminis sibi ut prenotatur impositi detinentur eidem Elvardo per executionem regalis iusticie restitui iubeatis de gratia vestra speciali In cuius rei testimonium sigillum nostrum presentibus duximus apponendum Datum apud Sunnyng vi kalendas Marcii anno domini MCC nonagesimo tercio