Charter Document - 03400412
| Charter Number: | 03400412 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1288 - 1289 |
| Date type: | Assigned |
| Resource Link(s): |
|
Charter:
Reverende discrecionis viro domino pariter et amico karissimo Henricus dei gratia priori ecclesie Cristi Can[tuarie] suus humilis et devotus Willelmus eadem gratia electus Sarr salutem et felicibus in Cristo successibus abundare Nisi spes ex verborum vestrorum tenore concepta tam ante maris transitum quam post reditum extitisset de loco consecracionis alibi quam in ecclesia Cristi Cant impetrando erga loci metropolitanum nullatenus laborassem Set ex quo frustrata est mea fiducia in hac parte pro constanti reputet vestra dilectio quod cum displicentia vestra aut scandalo aliquorum seu seniorum ipsius ecclesie seu etiam iuniorum locum alium preter sedem Cant impetrare decetero nullatenus laborabo Et si ista vestra voluntas m[ich]i fuisset preconata nec verbo nec nutu actum aliquatenus extitisset Ego enim qui iam pridem vestre pacis et tranquillitatis fervidus zelator extiti ab antiquo in eadem voluntate persistere et in eiusdem zeli proposito statui perpetuo permanere Et hec eadem si placet toti conventui ex parte mea poteritis nuntiare Et si erga me vestrum quicquam volueritis cum omni fiducia demandetis Valeat dominacio atque dilectio vestra in domino