Charter Document - 03400398
| Charter Number: | 03400398 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1286 |
| Date type: | Internal, Calendar, Episcopal |
| Resource Link(s): |
|
Charter:
Walterus dei gratia Sarr episcopus religiosis dominabus abbatisse et conventui Wylton salutem gratiam et benedictionem Venit ad nos nuper London Osbertus Giffard miles in animo vere contrito penitens ut speramus in lacrimis vero veniam petiit de commissis Et nos ad instantiam venerabilium patrum dominorum Cant archiepiscopi et aliorum episcoporum eiusdem provincie qui ibidem fuerant congregati eundem in forma iuris absolvimus iniungentes eidem ut quas sorores rapuit et abduxit una cum omnibus bonis ex ea causa vobis subtractis sine mora restituat et pro possibilitate sua satisfactione premissa pro offensis reconciliet vobis easdem ut eas ad vestri ordinis disciplinam admittere dignemini et favorabiliter pertractare graviores nihilominus et puplicas penitentias iniungentes eidem que ceteros ab huiusmodi flagitio terrere debebunt et vos et omnes de vestro confinio non latebunt Vobis igitur bona fide consulimus et iniungimus quatinus cum idem Osbertus ad vos venerit veniam petiturus in satisfactione petenda non nimis graves vos exhibeatis set eo licet modico quod facere potest contente sorores vestras que perdite fuerant et per dei gratiam sunt invente gaudentur admittere velitis Multi namque post lapsum resurgunt fortiores et speramus in domino quod ipse sic facient si non cum nimia severitate set in caritate non ficta temperate pertractentur Datum Lond octavo kalendas Martii pontificatus nostri anno secundo