Charter Document - 03400391

Frater Iohannes permissione divina Cantuariensis ecclesie minister humilis totius Anglie primas Abbatiam Rading nuper auctoritate metropolitica visitantes visa diligenter et intellecta ipsius necessitate monasterii ordinationem factam ad relevationem ipsius inter abbatem et conventum per venerabilem fratrem et coepiscopum nostrum Walterus dei gratia Sarisburiensem episcopum inibi visitantem cuius ordinationis scripture presens cedula est appensa de prudentum consilio confirmamus et quod omnis tergiversacionis effugium de medio subducatur adiciendo statuimus ut completo quinquennio de quo in predicta ordinacione fit mencio a festo sancti Michaelis in mense Septembri proximo futuro ut dicitur numerando omnes insolite et inopinate circa ardua expense necessarie quas abbas faciet infra tempus predictum de consilio discretorum sibi annis singulis al locentur juxta eciam quod legatus dinoscitur statuisse teneatur idem abbas coram conventu vel aliquibus ad hoc per collegium deputatis semel in quolibet anno infra quintanam sancti Michaelis distincte lucide et aperte reddere racionem cui raciocinio precipimus duodecim monachos per conventum electos annis singulis interesse qui quandocumque viderint abbatem in raciocinio notabiliter deficere ne possit estimacione consimili quod faciendum assumpsit in exoneracione domus a debitis confirmare hoc jussione et auctoritate presencium suo dioecesano teneantur scribere indilate ut ipse statim remedium adhibeat oportunum Et si dioecesanus ipse excluso dilacionis periculo nolit vel non possit ipsorum in hac parte necessitatibus indulgere id nobis nunciet sine mora Completis vero quinque annis predictis si inveniatur aliquid notabile insolutum de predicto debito remansisse si abbas ipse se possit super hoc racionabiliter excusare promittimus ut sextus annus ad solucionem completam residui sibi in forma consimili concedatur Alioquin contra ipsum juxta predicte ordinacionis tenorem cessantibus frivolis excusacionibus et promissionibus procedatur Volumus insuper ut abbas ipse interim de omnibus obedienciariis et ballivis domus communicato regulari consilio disponat et ordinet juxta quod necessitati predicte viderit expedire et omnes monachi suis eum juvent laboribus prout ipse decreverit ordinare hoc excepto quod porcio elemosinarii sibi integre perseveret Istis vero addicionibus nostris cavillaciones excludimus que possent ex abbatis quibusdam protestacionibus suboriri post premissam ordinacionem episcopi factis ut dicitur ab abbate quibus potestacionibus per ista decernimus esse plenaria satisfactum Completis vero quinque annis vel sex annis predictis et monasterio ipso predicto exonerato a debitis vel per defectum exoneracionis abbate a sua administracione ammoto precipimus ordinacionem nostram pro relevacione vestra dudum factam de consilio discretorum inviolabiliter observari in omnibus suis articulis et precipimus ut ad thesaurum veniant omnia bona domus hiis exceptis que sunt ad elemosinam assignata Si quis vero obedienciarius in reddendo raciocinio suo inveniatur in arreragiis onerosis audiatur sua excusacio si quam habet et fiat inquisicio indilate per monachum et secularem juratos de fideliter inquirendo et referendo et nisi inveniatur eorum inquisicio excusacioni predicte verisimiliter concordare hujusmodi obedienciarius a sua administracione amotus carceri mancipetur donec restituerit vel restitui procuraverit arreragia supradicta Aliter sine nostra licencia a carcere minime liberetur Ad hujusmodi autem raciocinium abbatis et obedienciariorum personas advocari fideles precipimus seculares que in raciociniis sunt experte Datum apud Radinges iiij kalendas Augusti anno Domini MCCLXXX quinto []