Charter Document - 03400345

Universis sancte matris ecclesie filiis Robertus permissione divina episcopus Sarr salutem in domino Altissimi nominis ad honorem optantes quod in ecclesia beate Marie de Boyton nostre dioecesis ex nostra sollicitudine cultus divinus perpetuis temporibus augeatur de ea nunc per resignacionem magistri Philippi de Stanton proximo ministrantis in ipsa vacante venerabili patre domino Godefrido Giffard episcopo Wygorn domino manerii de Boyton et ecclesie illius patrono hoc cum devota instancia postulante et ecclesiam ipsam ordinacioni et disposicioni nostre totaliter submittente ordinamus et statuimus quod rector illius qui pro tempore fuerit per nos et successores nostros ad presentacionem dicti domini episcopi et heredum vel successorum suorum predicti manerii de Boyton instituendus vite sit laudabilis et in presbiteratus ordine constitutus cure eiusdem personaliter intendat quodque tres alios dicti ordinis viros ydoneos de assensu patroni ecclesie ipsius eligat et nobis presentet quos cum admiserimus iuxta facultates suas in victualibus exhibeat congruenter eorum cuilibet annuatim duas marcas pro emendis vestibus et aliis necessariis in festis Annunciacionis dominice et sancti Michaelis pro equalibus porcionibus impensurus In quibus eligendis et presentandis si rector et patronus predicti discordes per unum mensem vel negligentes extiterint alii ydonei presbiteri loco deficienc[ium] ex tunc per nos et successores nostros canonice preficiantur ibidem eandem exhibicionem cum stipendiis percepturi Quod si rector taliter institutus in fata decesserit postquam fructus perceperit autumnales nihilominus eo anno dictis presbiteris sustentacio congrua cum stipendiis supradictis de fructibus illius integraliter ministretur et de medietate eius quod residuum fuerit decedens ipse testari possit et illius voluntas si inde testatus fuerit debitum sortiatur effectum alioquin de medietate ipsa fiat quod in casu consimili hactenus est optentum Altera vero medietas successori suo reservetur Et si quacumque parte anni alibi se transferendo gratis cesserit nichil omnino post cessionem huiusmodi percipiat set totum cedat in usum futuri rectoris pro oneribus predictis supportandis Omnes siquidem ad sancte conversacionis testimonium sub uno tecto commorantes honeste capis nigris et superpelliciis induti ecclesiam intrent ut domino laudes simul persolvant secundum usum nostre ecclesie cathedralis cum vigiliis et aliis obsequiis mortuorum horas canonicas decantando integraliter et distincte Ad disposicionem siquidem rectoris predicti ab ipsis quatuor quatuor misse cotidie celebrentur una de die alia de beata Virgine cum nota et due pro episcoporum Sarr Hugonis Giffard Sibille quondam uxoris eiusdem cuius corpus in dicta ecclesia quiescit humatum sue prolis parentumque suorum et omnium in Cristo quiescentium animabus nisi infirmitas alicuius eorum vel alia inevitabilis aut rationabilis causa prestiterit impedimentum Ad hec provideat idem rector unum diaconum et alium subdiaconum qui in ecclesia sibi et dictis presbiteris in horis canonicis peragend[is] et missis celebrandis assistant continue et ministrent Precipimus etiam quod qui ad rectorium huiusmodi fuerit admittendus antequam nanciscatur possessionem ipsius ecclesie prestet corporaliter iuramentum quod hanc nostram ordinacionem fideliter observabit et perfectius exequetur Dictoque rectori presbiteri memorati faciant simile sacramentum Porro prescriptis rectori et presbiteris prehabito super hoc tractatu cum capitulo nostro et eorum expresso accedente consensu ecclesiam supradictam cum suis pertinentiis perpetuo concedimus iuxta ea que iam diximus optinendam et auctoritate pontificali plenissime confirmamus Si quis igitur premissis in aliquo contravenire presumpserit indignacionem dei omnipotentis incurrat et Virginis gloriose In quorum testimonium nostrum ac nostri capituli ac venerabilis patris domini Godfridus Giffard episcopi Wygorn prelibati sigilla presentibus literis sunt appensa Datum apud Ramesbur xvii kalendas Ianuarii anno gratie MCCLXX nono