Charter Document - 03400344
| Charter Number: | 03400344 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1281 |
| Date type: | Internal, A.D., Calendar, Episcopal |
| Resource Link(s): |
|
Charter:
[U]niversis Cristi fidelibus presentes literas visuris vel audituris Robertus miseratione divina Sarr episcopus salutem in auctore salutis Noverit universitas vestra quod ex relatu plurium fidedignorum intelleximus quod capella secularium de Cernemue nostre diocesis ab antiquis prope mare constructa nunc autem per graves et continuos ipsius maris inpulsus subacta ruinam minatur tempestivam Ideo religiosis viris abbati et conventui monasterii de Forda predicte capelle patronis devote postulantibus auctoritatem prestamus et assensum ut capellam ipsam ad locum in proprio solo suo magis aptum licite transferant in quo capellam in honore beati Mathei apostoli omniumque sanctorum honorifice construant et in ea per clericos et presbiteros seculares cum debita devotione divina ministrari procurent Omnibus autem parochianis nostris et aliis quorum diocesani hanc nostram indulgentiam ratam habuerint de peccatis suis vere contritis et confessis qui de bonis sibi a deo collatis vel saltem per orationum suffragia locum ipsum honoraverint de dei misericordia beate Marie semper virginis beati Mathei apostoli omniumque sanctorum meritis confidentes quadraginta dies de iniuncta sibi penitentia misericorditer relaxamus indulgentias a venerabilibus patribus coepiscopis nostris huius rei gratia concessas et in posterum concedendas ratas habentes et acceptas salvis semper in omnibus iure matricis ecclesie de Witchurche et nostra et successorum nostrorum auctoritate et Sarr ecclesie dignitate Dat apud Wodeford xi kalend Septembris anno gratie MCCLXXX primo pontificatus nostri anno octavo