Charter Document - 03400286

In nomine domini nostri Ihesu Cristi Amen Nos Robertus miseratione divina Sarr episcopus ad memoriam futurorum Dum regularis vite sanctitatem hospitalitatis gratiam et cetera virtutum dona quibus religiosi viri abbas et conventus monasterii Cirencestr iuxta vulgi testimonium florere et inter ceteros ferventius divinis inherere dicuntur consideramus et attendimus dignum merito arbitramur ipsorum tranquillitati et quieti oportunis remediis paterna solicitudine prospicere ne litibus vexati in contemplatione ac religionis fervore tepescant vel exhaustis eorundem facultatibus a caritatis operibus quibus iugiter intendunt se subtrahere compellantur Sane inter magistrum Nicholaum de Mariscis rectorem ecclesie de Hakeborn nostre diocesis ex parte una et prefatos abbatem et conventum ex altera super quibusdam decimis et proventibus aliis que idem abbas et conventus in parochia eiusdem ecclesie percipere consueverunt necnon super tribus virgatis terre prato redditibus et iuribus aliis que similiter in parochia ipsa possidebant et que omnia dictus magister N ad ipsum ecclesie sue predicte nomine pertinere dicebat dudum materia questionis exorta et tam in foro ecclesiastico coram diversis iudicibus quam in curia reg[ia] diutius agitata tandem partes ipse pacis auctore desuper inspirante litium amfractus evitare et per viam pacis et concordie incedere cupientes super omnibus litibus et controversiis hincinde motis inter eos et toto iure quod eisdem in decimis seu proventibus aliis terris et possessionibus ac aliis omnibus in contentionem deductis competiit vel competere poterit quoquomodo in nos tanquam in arbitrum arbitratorem et amicabilem compositorem iudiciaria nichilominus potestate nobis reservata compromiserunt et se nostre ordinationi laudo et diffinitioni sponte pure libere et absolute submiserunt sub pena centum marcarum prout in instrumentis super hoc confectis plenius continetur Nos vero pro bono pacis et concordie eorundem subditorum laboribus compatientes et expensis compromissum arbitrium ordinationem et diffinitionem huiusmodi in nos suscipientes examinatis partium iuribus et habito super eisdem cum capitulo nostro et aliis peritis tractatu diligenti de eiusdem capituli consilio et assensu inter partes ipsas taliter arbitramur ordinamus statuimus et diffinimus Videlicet quod abbas et conventus predicti quibus ab olim ecclesiam ipsam de Hakeburn per felicis recordationis Lucium papam in proprios usus concessam et subsequenter per Celestinum successorem eiusdem specialiter confirmatam esse comperimus licet ipsi postea a privilegio et concessione huiusmodi per simplicitatem recedentes ecclesiam ipsam secularibus personis assignaverunt ab omnimoda prestatione decimarum tam maiorum quam minorum de dominicis suis que in presenti in eadem parochia excolunt et de nutrimentis animalium suorum et aliis quibuscumque inmunes sint et omnino quieti Medietatem vero omnium maiorum decimarum totius parochie de omnibus terris et possessionibus extra ortos excepto dominico rectoris nomine simplicis beneficii sine aliquo onere cure parochialis habeant et percipiant inperpetuum ipsosque quos non sine titulo privilegii et concessionis predicte per quadraginta annos et amplius predictas decimas pacifice et inconcusse possedisse comperimus ad beneficium privilegii et concessionis eiusdem per hanc nostram ordinationem restituimus prefato magistro N [et successoribus suis in] perpetuum silentium imponentes super eisdem Idem vero magister N et successores sui inperpetuum habeant tres virgatas terre cum septem acris prati et dimidia et cum quatuor cotagiis que omnia de dominico ipsius ecclesie esse consueverunt ab antiquo cum omnibus pertinentiis earundem preter pratum quod vocatur Chirchemede quod dictis abbati et conventui reservamus expresse habebunt etiam duos boves cum affro pascentes in pastura que vocatur Ruschi preter quatuor boves et unum affrum quos prius habuit in eadem Habebunt etiam idem magister N et successores sui alteram medietatem decimarum maiorum totius parochie et omnes minores decimas excepto dominico abbatis et omnes oblationes et obventiones altaris et cimiterii et quicquid ecclesie accidere potest preter ea que memoratis abbati et conventui superius specialiter concessa sunt et expressa hoc salvo quod pro medietate decimarum de dominico quondam Willelmi de Wyndes[ore] in Westhakeborn medietatem oneris scilicet decem solidos de viginti quos dicti abbas et conventus cum abbatissa et conventu monasterii sancte Marie Wynton que decimas ipsas percipere consueverunt componendo eis annuatim solvere convenerunt subeant et agnoscant et idem abbas et conventus residuum pro sua medietate persolvant Et habeant idem magister Nicholaus et successores sui curam totius parochie et veri rectores ipsius ecclesie censeantur in futurum et sustinebunt omnia onera ordinaria ipsius ecclesie tam episcopalia quam archidiaconalia cancelli et librorum et ornamentorum ac ministrorum ecclesie et omnia alia que veris ecclesiarum rectoribus incumbunt extraordinaria vero inter ipsos [et] abbatem et conventum predictos pro rata qua emolumenta percipiunt dividantur Et hec omnia iudiciaria potestate partium confessiones secuti sententialiter diffinimus et arbitraria potestate sub pena in compromisso expressa precipimus observari partes hincinde ab omnibus aliis questionibus exactionibus et iniuriis mutuo absolventes ac reservantes nobis potestatem partem renitentem ad premissa compellendi interpretandi et declarandi dubia quotiens ex verbis suprascripte ordinationis oriantur in futurum In cuius rei testimonium sigillum nostrum presentibus est appensum Dat et act apud Wodeford quinto id Iunii anno domini MCC septuagesimo octavo pontificatus nostri anno quarto