Charter Document - 03400271

Omnibus sancte matris ecclesie filiis ad quos presens scriptum pervenerit Walterus dei gratia Salesbiriens[is] episcopus salutem in domino Esus pomi vetiti proto plaustrum generis humani a paradiso legitur eiecisse hostisque antiqui seductum fraude subdola cum tota generatione ipsius gravi mortis ulcere sauciavit cui nullius artis medicinalis remedio poterat subveniri donec dei filius dominus noster Ihesus Cristus pro humani generis redempcione de summis celorum ad yma mundi descendens et mortem tandem subiens temporalem mortem nostram moriendo destruxit et vitam resurgendo reparavit humane propaginis mentes ad caritatis et salutis opera diversis exemplis et doctrina salubri excitans et inducens per que filii adoptionis in Cristo renati culpe veteris expiato contagio ab Egypciata servitute liberati pristine dignitatis iura et redempcionis gratiam poterunt promereri Sane karissimi in Cristo filii nobilis vir dominus Philippus Basset et Thomas de Gay rector ecclesie de Wucton Basset caritatis ac devocionis igne succensi prudenter attendentes sanum et honestum commercium esse illa que pretereunt pro hiis que preterire non poterunt commutare de possessionibus et facultatibus sibi a deo collatis pro salute animarum suarum et omnium antecessorum ac successorum suorum apud Wucton Basset quoddam xenodochium sive hospitale erigere fundare et construere proponunt pauperum Cristi usibus perpetuis temporibus deputand[um] nobis nostroque capitulo devote supplicantes quatinus pio ipsorum in hac parte proposito nostrum prebentes assensum xenodochium huiusmodi seu hospitale in loco predicto de bonis et possessionibus que eidem loco parati sunt dei intuitu conferre et assignare ordinare et stabilire episcopali auctoritate curaremus Nos igitur habito super omnibus negocium huiusmodi contingentibus cum capitulo nostro diligenti tractatu attendentes predictorum fundatorum devocionem quam erga deum et caritatis opera gerere dinoscuntur ne ea que ab ipsis pie provisa sunt et laudabiliter inchoata aliqua possint in posterum rerum facili malo modo quod absit mutabilitate convelli de decani et capituli nostri Sarr expresso consensu In nomine summe et individue Trinitatis patris et filii et spiritus sancti Ordinamus providenter et episcopali auctoritate statuimus quod in loco quem predicti nobilis et rector ad dicti xenodochii seu hospitalis fundacionem deo dederunt et assignaverunt de cetero in perpetuum sit xenodochium seu hospitale liberum cum libera capella in dei honore et gloriose virginis Marie ac beati Iohannis Baptiste omniumque sanctorum honore fundatum et omnibus libertatibus quibus domus huiusmodi in nostra civitate et dioecesi gaudent perpetuis futuris temporibus gaudeat inconcusse ac ex tunc sub nostra et successorum nostrorum protectione et defensione speciali cum personis terris possessionibus libertatibus et liberis consuetudinibus in presenti eidem datis seu assignatis vel in futurum rationabiliter adquirendis maneat in perpetuum salvo in omnibus iure parochial[is] ecclesie de Wucton cui per predicti hospitalis seu xenodochii fundationem quantum ad ea que ad idem hospitale pertinent in eadem parochia extra septa curie dicti hospitalis nolumus aliquod preiudicium generari De consensu tamen predicti nobilis dicte ecclesie patroni et dicti rectoris ordinamus et statuimus quod magister seu custos dicti hospitalis et fratres eiusdem loci cum familia sua infra septa curie sue commorante in nullo subiciantur parochiali ecclesie vel eiusdem rectori Ut autem locus predictus quatenus ad presens fieri potest sub certa dispositione limitetur ordinamus et statuimus quod in hospitali predicto sit unus sacerdos ydoneus et honestus qui a predicto nobili vel heredibus suis ad quos dicti hospitalis patronatus pertinet nobis vel successoribus nostris presentetur et admissus in forma iuris curam dicti xenodochii seu hospitalis in spiritualibus et temporalibus habeat et gerat et unum vel duos seu plures fratres presbiteros secundum quod facultates domus suppetere poterunt sub se habeat in habitu regulari de roseto ac crucem deferant inde super indumentis sicut magister et fratres hospitalis nostri Sarr et easdem habeant observancias quas habent magister et fratres hospitalis nostri Sarr predicti quas eis in scriptis de verbo ad verbum tradi precipimus Ad hec specialiter statuimus et ordinamus quod predictus nobilis et heredes seu assignati sui quocienscumque dictum hospitale magistro seu custode vacare contigerit ad ipsam custodiam unum presbiterum ydoneum de dicto hospitali vel extra nobis vel successoribus nostris possint licite presentare qui a nobis vel successoribus nostris admissus non possit a dicta custodia amoveri sine nostra vel successorum nostrorum auctoritate vel precepto set si minus ydoneus inventus fuerit removeri poterit per nos ad patroni denunciacionem cum de hoc legitime constiterit Volumus etiam quod alii sacerdotes dicti hospitalis et fratres ac etiam tota familia loci predicti magistro seu custodi eiusdem in temporalibus et spiritualibus obediant et intendant alioquin eidem magistro concedimus auctoritatem quod possit inobedientes canonice ac regulariter punire quociens opus fuerit Ordinamus etiam et statuimus quod cum ibidem tres fuerint presbiteri unus de die alter de beata Maria et tercius pro animabus patronorum et benefactorum dicte domus celebrent missas diebus singulis et horas canonicas ac beate Marie et pro defunctis simul dicant et in uno iaceant dormitorio et in uno refectorio communiter cum aliis fratribus sumant refeccionem cotidie egritudinis tempore dumtaxat excepto Statuimus nihilominus quod tres decem pauperes ad minus vel plures si facultates domus suppetant de parochia de Wucton diebus singulis in dicto hospitali semel in die refeccionem recipiant in pane et potagio sufficienti ac in potu et aliquo ferculo prout status domus poterit sustinere ita quod crescentibus facultatibus dicti hospitalis crescat quatenus poterit numerus pauperum diebus singulis ibidem reficiendorum Statuimus preterea de expresso dictorum fundatorum consensu quod si aliquo tempore futuro dicto hospitali vacante custode dictus dominus Philippus vel heredes aut assignati sui presbiterum ydoneum ad ipsam custodiam infra quatuor mensium spacium nobis vel successoribus nostris presentare ob miserint ex tunc licitum sit nobis vel successoribus nostris dicto hospitali providere de custode ydoneo illa vice salvo predicto domino Philippo et heredibus seu assignatis suis iure presentandi ad ipsam custodiam ut prius quando alias ipsam vacare contigerit Hanc autem ordinacionem fecimus de dominorum [] decani et capituli nostri Sarr consensu salva nobis et successoribus nostris plena potestate supplendi interpretandi et corrigendi ipsam quandocumque nobis videbitur expedire salvo etiam in omnibus iure et dignitate Sarr ecclesie et nostra et successorum nostrorum iurisdiccione et auctoritate pontificali In quorum testimonium sigillum nostrum et sigillum capituli nostri presenti scripto sunt appensa Datum apud Sarr vi idus Iunii anno domini MCC sexagesimo sexto Hanc autem ordinacionem nostram diligenter inspectam predicti dominus Philippus Basset et Thomas de Gay ex certa scientia ratam et gratam habentes eam suorum sigillorum munimine roborarunt anno et die supradictis