Charter Document - 03400264
| Charter Number: | 03400264 |
|---|---|
| Cartulary Title: | Salisbury 1263-1297 Volume 37 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1266 |
| Date type: | Internal, A.D. |
| Resource Link(s): |
|
Charter:
Universis sancte matris ecclesie filiis presentes literas inspecturis vel audituris Walterus permissione divina Sar episcopus salutem in domino Officii nostri debitum nos inducit ut apud omnes quatenus in nobis est pietatis officium prosequamur Sane cum dilecti filii prior et fratres hospitalis sancti Nicholai Sar ecclesiam suam de Boreghestok et religiosi viri abbas et conventus monasterii de Forda Cisterc[iensis] ordinis Exon[iensis] diocesis ecclesiam de Tumeworth sui patronatus et ipsius ecclesie advocationem de expresso consensu magistri Willelmi de la Wile rectoris eiusdem dispositioni ordinationi et diffinitioni nostre simpliciter et absolute submiserint ut de ipsis cum suis terris possessionibus et iuribus universis prout dominus nobis inspiraverit disponamus ordinemus et diffiniamus proventus earum quocumque nomine censeantur et fructus in usus cuiuscumque persone vel collegii vel alius in quoscumque pios usus libere convertendo prout in instrumentis super hiis confectis plenius continetur decani et capituli nostri accedente consensu In nomine patris et filii et spiritus sancti Amen Disponimus ordinamus et diffinimus quod omnes fructus et proventus ecclesie de Boreghestok cum omnibus iuribus libertatibus et pertinentiis suis in usus predictorum religiosorum de Forda fructus vero et proventus ecclesie de Tumeworth sicut rectores eiusdem ipsos retrotemporibus percipere consueverunt cum omnibus iuribus libertatibus et pertinentiis suis in usus predictorum prioris et fratrum de cetero convertantur ut hospitalitatis et pietatis opera uberius in eisdem exequantur Vicarias autem in utraque perpetuas constituimus earundem collationem cum eas vacare contigerit nobis et successoribus nostris reservantes Disponimus insuper ordinamus et diffinimus quod vicarius de Boreghestok obventiones oblationes altarium et omnes minutas decimas percipiet in perpetuum et duas marcas argenti nichilominus annis singulis in festis Nativitatis dominice et Pasche pro equalibus portionibus per manus predictorum abbatis et conventus de Forda Similiter vicarius de Tumeworth obventiones oblationes altarium et omnes minutas decimas percipiat in perpetuum et duas marcas argenti nichilominus annis singulis in festis Nativitatis dominice et Pasche pro equalibus portionibus per manus predictorum prioris et fratrum dicti hospitalis In cuius rei testimonium sigillum nostrum et predicti capituli nostri una cum sigill[is] predictorum abbatis et conventus [et] prioris et fratrum presentibus literis in modum chirographi confectis alternatim sunt appensa Facta fuit ista ordinatio in capitulo nostro Sar non Iunii anno gratie millesimo CC sexagesimo sexto