Charter Document - 03400257

Universis sancte matris ecclesie filiis presentes litteras inspecturis et audituris Walterus permissione divina Saresbirien[sis] episcopus salutem in domino sempiternam Deus ab inicio constituit hominem et reliquit eum in manu consilii sui adiecit mandata et precepta sua aquam et ignem vitam et mortem bonum et malum ponens ante illum ut ad quod vellet manum apponeret Sed proto dolor inter ipsa deliciarum sibi a deo collatarum primordia in gratitudinis et inobediencia scelus commisit liberi arbitrii iudicio nequiter abutendo Qua de causa ipsum cum tota posteritate sua fraudulenta diabolice suggestionis telo percussum divini precepti transgressio mortis sententia condemnavit et nihilominus ut in labore viveret iusta dei vindicta decrevit inmensa tamen misericordia creatoris ipsam sentenciam oleo suavitatis mitigando per subsequentis redempcionis gratiam prevaricacionis auctore devicto filios dextere vite eterne munere decoravit et ex sue bonitatis affluendo laborem homini post prevaricacionem indictum ad penam fideliter et iuste laborantibus meritorium ad gloriam esse voluit clemencia redemptoris Quapropter deo et hominibus se reddunt non inmerito gratiosos qui de suis iustis laboribus deum celi in terris satagunt venerari in hiis precipue per que divini cultus augmentum et sacrosancte ecclesie exaltatio provenit incessanter Sane dilectorum in Cristo filiorum vicariorum ecclesie nostre Saresbir laborem continuum et sollicitam diligenciam ac devocionis affectum quos circa divinum obsequium in eadem ecclesia iugiter impendunt paterna benivolencia considerantes ut eo magis ad bonum sue mentis intentio succendatur quo per devota sue probitatis merita et per gratuita circa dei et gloriose virginis patrone nostre obsequia etiam in temporalibus necessitatibus ampliorem sustentacionem sibi senserint accrevisse de expresso consensu karissimorum in Cristo filiorum decani et capituli nostri Sarr patronorum ecclesie de Wyndelsores in Dorset nostre dioecesis et Ricardi de Bekenesfeld dicte ecclesie rectoris qui sponte pure simpliciter et absolute totum ius quod in patronatu dicte ecclesie vel in ipsa ecclesia seu ad ipsam cum omnibus iuribus domibus et pertinentiis suis habuerunt vel habere potuerunt nostre ordinationi nostroque statuto et iudicio totaliter submiserunt predictam ecclesiam de Wyndelsores cum domibus ad rectorium eiusdem pertinentibus et omnibus aliis iuribus libertatibus et pertinentiis suis salva vicaria eiusdem quam nostre et successorum nostrorum collacioni perpetuis futuris temporibus reservamus predictis decano et capitulo ac ecclesie nostre Sarr perpetuis temporibus appropriamus in predictorum vicariorum usus proprios ad eorum sustentacionem perpetuo convertendam salva nobis potestate et successoribus nostris augmentandi dictam vicariam si aliquo tempore apparuerit eam esse nimis tenuem habita consideracione iusta ad facultates ecclesie de Wyndelsores supradicte Sustinebit autem vicarius ecclesie de Wyndelsores supradicte qui pro tempore fuerit omnia onera ordinaria debita et consueta dictam ecclesiam contingenda Ad hec statuimus et ordinamus quod quilibet vicarius ecclesie nostre presbiter unam missam et quilibet diaconus et subdiaconus vicarius unum psalterium qualibet ebdomada semel dicant cum summa devocione perpetuis futuris temporibus pro anima nostra et pro animabus predecessorum ac successorum nostrorum et specialiter pro anima magistri Roberti de Karevile quondam thesaurarii Sarr per quem ius patronatus predicte ecclesie de Wyndelsores et alia bona quam plurima ecclesie nostre Sarr fuerant adquisita et pro animabus omnium fidelium defunctorum In quorum testimonium nos et [] decanus ac capitulum nostrum Sarr presenti scripto sigilla nostra apponi fecimus Datum apud Sarr sexto idus Iunii anno domini MCCLX sexto