Charter Document - 03400255

Universis sancte matris ecclesie filiis presentes literas inspecturis vel audituris Walterus permissione divina Sar episcopus salutem in domino sempiternam Quoniam communam cathedralis ecclesie nostre Sarr ita tenuem esse novimus quod vix est aliquis eiusdem ecclesie canonicus qui onera residentie in eadem ecclesia faciende honorifice vivendo prout decet possit commode sustinere sicque timemus quod ecclesia nostra predicta que quantum ad usum divini obsequii aliarum ecclesiarum regni Anglie informatrix esse dinoscitur et exemplar per absentiam canonicorum occasione insufficientie predicte commune non residentium precipue temporibus karistie que in partibus illis frequenter ingruit diminutionem cultus divini quod absit plus solito patiatur nisi ipse qui sua omnipotentia montium ponderans gravitatem et amplitudinem terre palmo concludens summa sua providentia recte universa disponit sua ineffabili sapientia rationabiliter moderatur et mira providentia salubriter dirigit et gubernat per archanum superne providentie consilium nostram insufficientiam in hiis et aliis suppleat et emendet nos consideratis diligenter prout plenius potuimus circumstantiis universis per quas credebamus premissis posse remedium commodius adhiberi ordinate caritatis viam que communa propriis non propria communibus auctoritate pontifical intuentes communemque utilitatem private prout oportet preponentes ecclesiam de Sutton quam religiosi et deo devoti viri abbas et conventus Malmesbur nostre diocesis eiusdem ecclesie de Sutton veri patroni ex devotione quam erga deum et gloriosam Virginem ecclesie nostre patronam gerunt cum omnibus iuribus et pertinentiis ad ipsam ecclesiam de Sutton vel monasterium suum Malm ratione eiusdem ecclesie quocumque modo pertinentibus nostre ordinationi pure simpliciter et absolute submiserunt de consensu decani et capituli nostri Sar cum quibus super hoc diligenter tractavimus ac etiam de consensu expresso et bona voluntate discretorum virorum magistri Radulfi de Heyham cancellarii Sar qui dicte ecclesie de Sutton possessioni incumbebat ut verus rector eiusdem et defensor legitimus ac magistri Rogeri de la Grene archidiaconi Wilt qui de proventibus dicte ecclesie de Sutton viginti marcas annuas per quandam compositionem aliquando percepit facta a predictis Radulfo et Rogero spontanea et expressa renuntiatione iuris quod in dicta ecclesia de Sutton vel suis pertinentiis habebant vel ad eam ab annua pensione viginti solidorum et alio quocumque iure subiectionis perceptionis et exactionis ratione sepulture vel alia quacumque occasione ipsis abbati et conventui aliquando concessis factis et solutis liberamus et liberam efficimus et matricem statuentes et decernentes quod dicta ecclesia futuris temporibus monasterio Malmesbur in nullo sit astricta seu obligata Et memoratis decano et capitulo nostro Sar et eorum successoribus ad perpetuam predicte commune augmentationem concedimus et auctoritate pontificali appropriamus salva vicaria eiusdem ecclesie de Sutton quam vicariam nostre et successorum nostrorum collationi perpetuis temporibus reservamus Et ne super taxatione seu ordinatione predicte vicarie dubitationis seu contentionis materia oriri possit in futurum de predictorum decani et capituli consensu providemus ordinamus et statuimus quod singuli vicarii dicte ecclesie de Sutton qui pro tempore fuerint omnes fructus et proventus dicte ecclesie de Sutton cum domibus terris pratis et aliis pertinentiis cum omni integritate recipiant et habeant ac communario ecclesie Sar nomine decani et capituli recipienti triginta marcas bonorum et legalium esterlingorum in ecclesia Sarr solvant suis sumptibus et periculo annis singulis inperpetuum quatuor anni terminis videlicet in festo sancti Michaelis centum solidos in festo Nat[alis] domini centum s in festo Pasche C s et in festo Nat[ivitatis] sancti Iohannis Baptiste C s Ita videlicet quod viginti marcas de predictis triginta marcis inperpetuum cedant in usus dicte commune et de residuis decem marcis celebretur annis singulis post obitum nostrum anniversarii nostri dies et memoria prout moris est in ecclesia nostra Sar circa quam anniversarii nostri celebrationem hec futuris temporibus sub divini animadversione iudicii precipimus observari videlicet quod de decem marcis predictis quilibet canonicus ecclesie nostre Sar duodecim denarios quilibet vicarius sex denarios quilibet puer de choro et quilibet altarista unum denarium qui anniversarii nostri celebrationi ad omnium fidelium defunctorum et nostri memoriam in ecclesia nostra predicta anniversarii nostri die interfuerit recipiat per manus communarii ecclesie nostre Sar supradicte Et quicquid de dictis decem marcis hiis superfuerit annis singulis eadem anniversarii die pauperibus et egenis de civitate Sar et aliis ibidem confluentibus erogetur Providemus etiam ordinamus et statuimus quod singuli vicarii predicte ecclesie de Sutton qui pro tempore fuerint preter hec sustineant suis sumptibus omnia onera ordinaria predicte ecclesie de Sutton debita et consueta et quod post institutionem suam in capitulo nostro Sar antequam possessionem suam ingrediantur corporale prebeant iuramentum quod predictas triginta marcas terminis statutis predicto communario ecclesie nostre Sar plene persolvent Et si contigerit eosdem cessare aliquo terminorum predictorum in solutione pecunie memorate per ordinarium loci ad simplicem denuntiationem ipsorum decani et capituli monitione premissa excommunicentur et post mensem a dicta excommunicatione numerandum ipsa vicaria tanquam periuri sine strepitu iudiciali priventur et solempniter excommunicati et periuri denuntientur donec dictis decano et capitulo in premissis satisfecerint conpetenter In quorum testimonium et memoriam perpetuam tam nos quam decanus et capitulum supradicti presentibus literis patentibus sigilla nostra apponi fecimus Predicti etiam abbas et conventus hanc nostram ordinationem in omnibus et per omnia ratam gratam habentes et acceptam in premissorum omnium testimonium sigilla sua apponi fecerunt Dat apud Sar quintodecimo kal Augusti anno domini MCC sexagesimo quinto