Charter Document - 03400243

Universis sancte matris ecclesie filiis presentes litteras inspecturis vel audituris Walterus permissione divina Sar episcopus salutem in domino sempiternam Cum secundum apostolum operari debeamus bonum ad omnes maxime autem ad eos qui per devota pietatis opera domesticos fidei se esse demonstrant et relictis vagis mundi discursibus sub arce religionis observantia muro se muniunt honestatis per variosque virtutum gradus scandere satagunt ad arcem beatitudinis ex qua dependet omnis armatura fortium nos attendentes summe devotionis affectum religiosorum virorum abbatis et conventus monasterii Malmesbir nostre diocesis qui elemosinarum largitionibus hospitum receptioni et aliis caritatis operibus ad quorum sustentationem pre multitudine pauperum ac hospitum ibidem confluentium proprie dictorum abbatis et conventus non suppetunt facultates relegata procul avaritia vacant more cotidiano de virtute in virtutem gradientes per ipsius clementiam qui dat affluenter et non improperat deum deorum in Syon iugi contemplatione visuri ut misericordie operibus hospitum et egenorum necessitatibus pie subveniendo eo liberalius possi intendere quo monasterii sui facultates amplius susceperint incrementum ecclesiam de Kemele in qua ius optinent patronatus nostre diocesis predictis abbati et conventui ac eorum successoribus suoque monasterio ad pauperum et hospitum ibidem declinantium sustentationem de decani et capituli nostri Sar cum quibus super hoc diligenter tractavimus bona voluntate et consensu expresso concedimus et appropriamus cedente vel decedente eiusdem ecclesie rectore perpetuis temporibus cum omni integritate et immunitate qua ecclesias sancte Marie et sancti Pauli in Malmesbur obtinent canonice possidendam salva vicaria in eadem ecclesia ordinata ad quam dicti abbas et conventus ac eorum successores quotienscumque vacaverit nobis et successoribus nostris personam ydoneam presentabunt qui onus procurationis seu alia onera ordinaria ad nos seu successores nostros vel locorum archidiaconum qualitercumque spectantia sustinebit imperpetuum salvaque potestate libera nobis et successoribus nostris augmentandi portionem predicti vicarii si aliquo tempore apparuerit eam esse nimis tenuem habita ratione ad fructus et proventus ecclesie supradicte salvis etiam in omnibus iure et auctoritate pontificali nostra et successorum nostrorum ac ecclesie nostre Sar dignitate Ita tamen quod ipse abbas suique successores vocari non possint ratione predicte ecclesie de Kemele ad synodum vel ad obedientiam manualem nobis et successoribus nostris faciendam vel episcopalia placita aliasve convocationes auctoritate nostra vel successorum nostrorum faciendas nisi in casibus in quibus ipse suique predecessores vocari consueverunt In quorum testimonium et perpetuam memoriam tam nos quam decanus et capitulum supradicta presentibus litteris patentibus sigilla nostra apponi fecimus Datum apud Saresbir in festo sancti Iohannis ante portam Latinam anno ab Incarnatione domini MCC sexagesimo quinto