Charter Document - 03392095
| Charter Number: | 03392095 |
|---|---|
| Cartulary Title: | Salisbury 1229-1262 Volume 36 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1242 |
| Date type: | Assigned |
| Resource Link(s): |
Reference Document for this Embedded Document |
Charter:
Universis sancte matris ecclesie filiis ad quos presens scriptum pervenerit Robertus de Lexinton canonicus Sarr de prebenda Cerministr et Bere salutem eternam in domino Honestum est et rationi conveniens ut ecclesiarum prelati iustis fidelium peticionibus grato concurrant assensu quorum beneficiis ecclesie se senciunt honorari Sane cum dilectus in Cristo dominus Bartholomeus de Turbervill ecclesie de Ber gratus extiterit et devotus omnes decimas suas de toto dominico suo de Winterborn Turbervill maiores scilicet et minores quocumque nomine censeantur pro se et heredibus suis conferendo eidem quas dicta ecclesia numquam antea optinuit set pro voluntate sua et antecessorum suorum cui volebant conferebantur eius precibus inclinatus pietatis intuitu et divini cultus ampliandi optentu sibi et heredibus suis pro me et successoribus meis concessi ut in perpetuum habeant cantariam communicent et iura parochialia percipiant in capella sua de Winterborn Turbervill cum uxoribus suis et libera familia sua ac hospitibus suis per suum proprium capellanum idoneum m[ich]i et successoribus meis presentandum ac suis per omnia sumptibus sustentandum qui prestito iuramento cavebit de omnimoda indempnitate ecclesie de Ber fideliter in omnibus erga ipsam et canonicos qui pro tempore fuerint se habendo et canonice obediendo Preterea concessi prefato Bartholomeo et heredibus suis pro me et successoribus meis ut eorum uxores ac alie libere mulieres sibi domestice si contigerit eas in domo sua apud Winterborn Turbervill parere in eadem capella possint purificari capellano in eadem ministrante omnes oblaciones predictorum in ipsa factas percipiente salvis michi et successoribus meis inperpetuum cohercione et iurisdictione omnimoda in eisdem personis et ceteris omnibus de curia sua quocienscumque in prebenda deliquerint Ut autem hec mea concessio perpetue firmitatis robur optineat presentem cartam sigilli mei munimine duxi roborandam Hiis testibus domino W abbate de Cern H thesaurario Sarr Roberto de Notingh Ricardo capellano persona de Tanewrth magistro Willelmo de Suwell Iohanne de Dorecestr capellano Iohanne de Ripariis Roberto de Cheselborn Waltero de Musters et aliis