Charter Document - 03392030

Universis sancte matris ecclesie filiis presens scriptum visuris vel audituris frater Radulfus de Wlveleg minister ordinis Sancte Trinitatis et Captivorum in Anglia salutem in domino sempiternam Cum discretus vir dominus Stephanus de Thissebiri archidiaconus Wyltesyrie rector ecclesie de Estone pariter et patronus ad gubernationem hospitalis de Estone fratrem Nicholaum de ordine nostro venerabili in Cristo patri R dei gratia episcopo Sarr loci diocesano caritatis intuitu presentasset ut secundum ordinationem ab eodem domino et patre eiusdem loci capituli concurrente assensu olim factam ministraret et procuraret in eodem onera in dicta ordinatione contenta absque reclamatione qualibet singulis temporibus sustinendo salvis iuribus autoritate et dignitate prout moris et iuris est tam in ordinariis quam extraordinariis visitationibus precipue correctionibus sive ad episcopum archidiaconumve ceterosve ministros pertineant ut nulli predictorum ex hoc preiudicium generetur gubernationem et custodiam dicti hospitalis de nostra voluntate et auctoritate sic duxit admittendam cum ecclesia parochiali de Estone nullo iure seu privilegio impetrato vel in posterum impetrando prevalente quominus tenor ordinationis predicte sigillis domini episcopi et capituli consignate perpetuis temporibus non observetur Quod si quocunque casu seu autoritate dicta ordinatio violetur aut quicquam fiat quominus suum sortiatur effectum per hoc presens scriptum nos specialiter obligamus habentes ad hoc generalem et specialem negotiorum administrationem et omnimodam potestatem in Anglia quod dictam ordinationem plene et integre absque verborum calumpnia futuris et perpetuis temporibus observabimus [et per nostros] ibidem successive ministros perpetuis temporibus faciemus observari Alioquin liceat heredibus dicti archidiaconi quibuscumque et loci diocesano tam de hospitali quam de rebus ipsius tanquam de vacante ordinare inpune nullo eis propter hoc preiudicio gene[rando] et nostra aut fratrum nostrorum reclamatione aut impetratione aliquatenus non obstante salvis in omnibus iure et autoritate pontificali et diocesano sicut in ceteris ecclesiis et hospitalibus observatur vel observari debeat que iure pontificali sibi obediunt aut modo quolibet sunt subiecta Ut autem hec res stabilis perseveret huic scripto sigillum magis autenticum totius ordinis nostri in Anglia apposuimus Omnibus Cristi fidelibus ad quos presens scriptum pervenerit frater Nicholaus de Northfocka de ordine Sancte Trinitatis et Captivorum salutem in domino Noveritis me autoritate fratris Nicholai maioris ministri totius ordinis Sancte Trinitatis et Captivorum iuxta cautionis et carte sue cont[inen]tiam super hoc negotio confecte in perpetuum una cum confratribus et successoribus meis eiusdem ordinis domino Stephano archidiacono Wiltesirie et suis heredibus et successoribus districtius obligari per presentes litteras ad sustentationem trium capellanorum [in] ecclesia de Estone in habitu nostro et ordine futuris temporibus deservientium proinde statuto quod in hospitali eiusdem loci iuxta domus ipsius facultates hospitalitatem et cetera pietatis opera faciemus iuxta ordinationem venerabilis patris domini Roberti Sarr episcopi capituli sui interveniente assensu olim factam quam promittimus in omnibus et per omnia fideliter observare In cuius rei testimonium sigilli nostri inpressionem presentibus appendi Dat decimo kls Maii anno gratie MCCXLV