Charter Document - 03391008

Omnibus sancte matris ecclesie filiis presens scriptum visuris Robertus dei gratia abbas Abbend et eiusdem loci conventus humilis et Rogerus rector ecclesie de Wrthe salutem in domino Noverit universitas vestra quod cum inter nos lis mota fuisset super omnibus decimis croftarum de Draicote et de la More et omnibus decimis hechingiarum totius parochie de Wrthe coram magistro Willelmo archidiacono Berk auctoritate ordinaria et postmodum super eisdem decimis in arbitros compromisissemus cum iuris ordine observato in processu arbitrii fere ad sententiam diffinitivam perventum exstitisset lis mota tandem de communi consensu amicabili compositione perpetua et reali coram domino Sar nomine ecclesiarum nostrarum scilicet Abbend et Wrth facta inter nos in hunc modum conquievit Videlicet quod ego abbas Abbend et eiusdem loci conventus percipiemus omnes decimas tam de croftis quam de campis predictarum duarum villarum scilicet de Draicote et de la More quolibet anno quo seminantur super warecto et ecclesia de Wrth anno secundo Et si contigerit quod anno tertio continue seminentur decimas garbarum ex equo dimidiabimus Et si ulterioribus annis vel anno continue seminentur tunc anno quarto decimas predictas integre percipiemus et dicta ecclesia anno quinto et sexto anno sicut prenotatum est dimidiabimus et sic deinceps Ita tamen quod quotienscumque seminate fuerint terre supradicte super warecto nos decimas earundem integre percipiemus et sic deinceps ordo predictus observabitur Idem fiet de illa pastura que iacet iuxta Herewaldon si redigatur ad culturam Salve tamen sint ecclesie de Wrthe singulis annis decime illarum trium croftarum quas tenent Galfridus ad moram Henricus Milce et Henricus ad cameram Predictus etiam modus percipiendi decimas in campis de Wrthe et de Cerneya observabitur si forte contingat quod modo supradicto seminentur Hoc tamen salvo quod in dominico nostro ubicumque in predicta parochia situm fuerit ecclesia de Wrthe nichil occasione hechingarum percipiet excepto quodam frussato decem et novem acrarum de quo decimas integras singulis annis dum seminatur habebit Item cum inter nos lis mota et diutius coram memorato archidiacono agitata fuisset super omnibus decimis wikariorum et piscariarum de tenemento nostro in Wrthe et molendini de Cernei lis tandem de communi consensu amicabili compositione perpetua et reali coram eodem episcopo inter nos facta in hunc modum conquievit Videlicet quod predicta ecclesia de Wrthe omnes decimas garbarum wicariorum predictorum sicut percipere consuevit percipiet [et decimas lini purcellorum aucarum et columbariorum eorundem similiter percipiet] nos autem omnes alias decimas predictorum wikariorum et omnes decimas piscariarum de tenemento nostro in Wrthe et decimas molendini de Cerneia et cuiusdam hamme ad dictum molendinum pertinentis que modo solvuntur et in posterum solvi possint integre percipiemus solvendo inde annuatim supradicte ecclesie de Wrthe per manus elemosinarii nostri xxx solidos sterlingorum ad tres anni terminos apud Wrthe scilicet x solidos ad Pascha x ad festum sancti Michaelis et x ad festum sancti Thome apostoli Ut autem hec compositio nomine ecclesiarum nostrarum inter nos inita perpetue optineat robur firmitatis huic instrumento in modum cirographi confecto sigilla nostra apposuimus