Charter Document - 03390105

[U]niversis sancte matris ecclesie dei filiis ad quos presentis scripti notitia pervenerit Robertus miseratione divina Sarr ecclesie minister humilis salutem in domino Ihesu Cristo cum amplexu devotionis sincere Nostre sollicitudinis suadet officium ut ad pia loca que ad divini cultus venerationem hospitalitatis gratia sunt statuta et ad usus frequenter necessarios populorum pios protectionis oculos erigamus ad huiusmodi quorum opera caritatis alios invitare tenemur non solum exhortatione sermonum set exemplo operis cum effectu Sane cum in civitate nostra Sarr hospitale sancti Nicholai iuxta pontem maiorem ad recipiendum et sustentandum pauperes laudabiliter sit fundatum et supra dictum pontem capella sancti Iohannis Baptiste divino in eadem instituto servitio sit erecta nos attendentes utramque fundationem cultui complacere divino de voluntate et assensu domini Roberti decani et capituli nostri Sarr ad sustentationem dicti hospitalis et conservationem dicte capelle et pontis quorum quidem hospitalis et capelle idem decanus et capitulum patroni existunt quasdam res et possessiones divine contulimus intuitu caritatis quedam vero bona ab aliis collata eisdem pontificali auctoritate liberaliter confirmamus Que quidem certis duximus vocabulis exprimenda ecclesiam videlicet de Wivelesford dudum collatam eisdem salva vicaria taxata in eadem et ecclesiam de Burhestok cum suis pertinentiis universis pensionem quoque quinque marcharum de ecclesia de Ansteya percipiendam annuatim ab Hospitalariis ibidem commorantibus ad festum sancti Michaelis et ad Pascha pro equalibus portionibus et pensionem triginta solidorum annuatim percipiendam de prioratu de Farlegh videlicet ad festum sancti Michaelis decem solidos ad Annuntiationem sancte Marie decem solidos [et] ad festum sancti Iohannis Baptiste decem solidos que adquisivimus dictis hospitali et ponti et ad usus ipsorum rata habemus Eadem vero auctoritate et eorundem interveniente assensu concessimus et confirmamus dictis hospitali et ponti decem marchas annuas percipiendas de molendinis nostris in civitate nostra Sarr per manum ballivi nostri ad Pascha [et] ad festum sancti Michaelis pro equalibus portionibus duratura prestatione predicta quousque per nos vel successores nostros dictis hospitali et ponti in tanto redditu annuatim provisum fuerit certo loco Preterea quinquaginta et duos solidos a dictis decano et capitulo ad Natale domini ad Pascha ad festum sancti Iohannis Baptiste et ad festum sancti Michaelis pro equalibus portionibus annuatim percipiendos de una hyda terre in villa de Stratford Ad hec concessimus et confirmamus eisdem xl acras de terra nostra in circuitu hospitalis ut tenentes habeant ibi et redditus recipiant de eisdem in temporalibus et spiritualibus pleno iure De mansione magistri Ade de Essebi quondam cancellarii Sarr viginti solidos a quocumque qui dictum mansum tenuerit custos hospitalis et pontis recipiet annuatim ad festum sancti Michaelis et ad Pascha pro equalibus portionibus hoc autem prestare cavebit ante ipsius ingressum coram decano et capitulo quicumque futuris temporibus predictum mansum tenere voluerit Ad hec concessimus et confirmamus predicto hospitali et ponti terram que fuit Ricardi filii Aucher que iacet versus Fissertone Insuper et totum redditum in civitate Sarr qui dudum fuit Petri Burel percipiendum ad quatuor anni terminos principales Item mansum iuxta vetus hospitale versus aquilonem salvo nobis antiquo redditu nobis debito de eodem Item octo solidos de tenemento quod tenet Nicholaus de Len in magna strata Hec autem predicta per manum custodis dictorum hospitalis et pontis recipiantur et procurentur [et] in proprios usus hospitalis et pontis integraliter convertantur quo magis et melius possit hospitalitas sustentari et capella sancti Iohannis cum pontis refectione in posterum procurari In huius rei testimonium et robur perpetuum presens scriptum nostro et capituli nostri sigillis fecimus communiri Hiis testibus domino Roberto decano Sarr magistro Radulfo de Heham cancellario domino Henrico thesaurario domino Nicholao subdecano Rogero succentore magistro Radulfo de Ebor[aco] magistro Roberto de Carvill tunc officiali nostro magistro Ricardo de Benham magistro Rogero de la Grene Waltero de la Wile Roberto Foliot Roberto de Wichamtone canonicis Sarr et aliis Datum secundo idus Octobris anno domini MCC quadragesimo quinto