Charter Document - 03390100
| Charter Number: | 03390100 |
|---|---|
| Cartulary Title: | Salisbury 1229-1262 Volume 36 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1246 |
| Date type: | Internal, A.D., Calendar |
| Resource Link(s): |
|
Charter:
Universis sancte matris ecclesie filiis presens scriptum inspecturis vel audituris Robertus divina permissione Sar ecclesie minister humilis salutem in domino sempiternam Cum de assensu et voluntate dilectorum filiorum domini Roberti decani et capituli Sar olim ordinaremus vicariam in ecclesia de Bremele statuentes ut vicarius qui pro tempore foret in eadem solveret annuas viginti quinque marcas argenti succentori Saru distribuendas inter vicarios Saresberien[sis] ecclesie ministrantes ad missam beate Marie que ibidem more cotidiano celebratur prout instrumentum nostrum super ea ordinatione confectum plenius testatur nos ut ipsi vicarii iugum domini quamvis suave et onus eius licet leve collis et humeris suis imposita in hac parte facilius et hillarius devoti supportent Roberti decani et capituli nostri Saru interveniente assensu statuimus ordinando et ordinavimus statuendo quod dilectus filius Adam de Welinton cui predictam vicariam contulimus intuitu caritatis et successores sui qui pro tempore fuerint predicte ecclesie de Bremele vicarii de iamdicte ecclesie vicarie fructibus quinque marcas annuas ultra predictas viginti quinque marcas eisdem terminis quibus et ipse viginti quinque marce solvuntur vicariis supradictis persolvat distribuendas integre et equaliter inter eos Ut autem hec ordinatio nostra robur optineat perpetue firmitatis eam presentis scripti attestatione et sigilli nostri appositione una cum sigillo capituli nostri duximus muniendum Dat per manus Roberti de Beauveir capellani nostri ii kl Novembris anno gratie millesimo CC quadragesimo sexto Valete