Charter Document - 03390096
| Charter Number: | 03390096 |
|---|---|
| Cartulary Title: | Salisbury 1229-1262 Volume 36 |
| Charter Language: | Latin |
| Charter Origin: | Religious |
| Charter Type(s): | Declaration |
| Date: | 1243 |
| Date type: | Internal, A.D., Feast |
| Resource Link(s): |
|
Charter:
Omnibus Cristi fidelibus presens scriptum inspecturis vel audituris Robertus dei gratia episcopus Sar salutem in domino Cum sit humana labilis memoria super hiis que provide acta sunt et concessa ideo autentica conficiuntur instrumenta ut eorum perpetuetur memoria et firmitas maneat inconcussa Sane cum a predecessoribus nostris capituli nostri concurrente consensu circa quatuor personas ecclesie nostre sit multiplici ratione provisum et unanimi statuto firmatum ut si de quocumque illorum post diem Pasche humanitus contigerit a die obitus sui medietatem omnium fructuum dignitatis usque ad festum sancti Michaelis percipere teneatur defunctus alia medietate reservata substituendo et cum etiam statutum sit et hactenus optentum in memorata ecclesia quod si canonicus ante Letare Ierusalem obierit et terram prebende sue propriis sumptibus excoluerit vel ad excolendum tradiderit qui fructus anni percipiet laborem illi qui terram excoluit sine aliqua diminutione refundet ad valorem precii illius diei in quo canonicus decedit ne aliquis crescente temporis malicia perverse interpretans et contentionem querens hoc asserat non esse similiter intelligendum de terris dominicis dignitatum et ex hoc accideret quod miserabilior esset conditio personarum quam simplicium canonicorum cum eorum conditio ratione continue residentie iuste et pie debeat meliorari paterna pietate et pastorali sollicitudine predicto morbo occurrere cupientes et materiam scismatis amputare desiderantes de consilio et consensu capituli nostri hunc articulum taliter duximus declarandum et interpretandum videlicet quod quicquid circa terram canonicorum est provisum hoc etiam circa terram personarum et dignitatum illorum volumus esse intelligendum Quod ne decetero alicui veniat in dubium statutum ipsum modo predicto interpretatum auctoritate pontificali confirmamus et tam sigilli nostri quam sigilli capituli nostri appositione fecimus roborari Act in sollempnitate Nativitatis domini anno ab incarnatione domini MCC quadragesimo tercio