Charter Document - 03390082

Omnibus Cristi fidelibus ad quos presens scriptum pervenerit Robertus miseratione divina Sar ecclesie minister humilis salutem in domino Universitati vestre presentibus innotescat quod cum magister Gilebertus de Biham rector ecclesie de Thacham dilectos filios abbatem et conventum Rading super tertia parte omnium terrarum decimarum fructuum et proventuum eiusdem ecclesie necnon et ix marcis annuis eisdem monachis ad hospitalitatis honera subportanda capituli nostri Sar accedente assensu in usus proprios et perpetuos de ecclesia supradicta concessis et rebus aliis ad dictam ecclesiam spectantibus coram archidiacono et decano Oxon auctoritate domini pape traxisset in causam partes in nostra presentia constitute litteris impetratis et impetrandis questionibus motis et movendis et predictarum rerum concessionibus sponte et absolute renuntiantes ordinationi nostre sese penitus submiserunt Nos igitur ut paci et tranquillitati partium et earum successorum futuris et perpetuis temporibus provideatur habita deliberatione ordinationem super premissis ad ipsarum partium instantiam in nos suscipientes deum habendo pre oculis de consilio iurisperitorum invocata spiritus sancti gratia taliter duximus ordinandum Videlicet quod dictus Gilebertus rector predicte ecclesie de Thacham et successores sui habeant et possideant totam ecclesiam de Thacham cum omnibus iuribus suis libertatibus et pertinentiis suis libere quiete integre et pacifice in perpetuum sustinendo onera ordinaria spectantia ad ecclesiam supradictam Ordinavimus etiam de consensu dicti rectoris quod dicti abbas et conventus percipient xx marcas annuas nomine perpetui beneficii a dicto rectore et suis successoribus in perpetuum solvendas ad iiii anni terminos videlicet ad Natale domini v marcas ad Pascha v marcas ad festum Nativitatis sancti Iohannis Baptiste v marcas et ad festum sancti Michaelis v marcas Ita tamen quod dicti abbas et conventus cum aliquid extraordinarium prefate ecclesie de Thacham fuerit impositum id pro portione sua subeant et agnoscant Nulli ergo hominum hanc nostre ordinationis paginam audeant infringere vel ei ausu temerario contraire Si quis autem ausu temerario eam infringere temptaverit indignationem dei et beate virginis et omnium sanctorum se noverit incursurum In huius rei testimonium presens scriptum sigillo nostro duximus muniendum Hiis testibus [E archidiacono Berk tunc officiali nostro Petro de Cumb Waltero de la Wyle Galfrido de Bedef canonicis Sar Th de la Wyle senescallo nostro Roberto Foliot Roberto de Wichamt Willelmo de Castellis clericis nostris et aliis] Act[um] apud Ramebir vii idus Februarii anno gratie MCCXXXIX