Charter Document - 03390054
| Charter Number: | 03390054 |
|---|---|
| Cartulary Title: | Salisbury 1229-1262 Volume 36 |
| Charter Language: | Latin |
| Charter Origin: | Religious |
| Charter Type(s): | Ordination |
| Date: | 1241 |
| Date type: | Internal, Calendar, Episcopal |
| Resource Link(s): |
British Library - Add MS 88973 (f7v) British Library - Add MS 88974 (f60r) |
Charter:
Robertus dei gratia episcopus Sarr dilectis in Cristo filiabus Ele eadem gratia abbatisse et conventui monialium de Lakoc salutem gratiam et benedictionem Cum iuxta merita deceat premia dispensare non est gerendum graviter aut indigne si clarioribus virtutum radiis choruscantes suis hoc meritis quasi ex debito vendicantibus in optinendis graciis ceteris preferantur ut dum bene meritos congruis premiis alii conspiciunt muneratos ad bene merendum emulacione laudabili forcius animentur Cum igitur tu filia abbatissa dum olim inter seculi nobiles dignitate seculari fulgeres eo tibi qui ubi vult spirat desuper inspirante patrimonium tuum domino dedicans illud quibusdam monasteriis que in eodem ut cultum divinum ampliares de novo fundasti de salute propria cogitans provide duxeris applicandum ac postmodum tua teque salubriter abnegans habitu religionis suscepto ea que prius te gratia prosequente adeo virtutum profeceris incrementis quod meritis tuis exigentibus auctoritate et assensu quorum interfuit in hac parte disponente domino in primam predicti monasterii abbatissam assumpta gregis tui numerum ac hospitalitatis gratiam tui regiminis tempore laudabiliter duxeris ampliandos quia possessiones predicti monasterii que nunc sunt expensarum eidem incumbencium onera nequeunt sustinere nos ob vite mundiciam et religionis fervorem que in novella monasterii vestri plantacione florere cognovimus ac meritorum tuorum optentu quo magis in vobis unitatis interioris federa sinceriori caritate solidentur ac hospitalitatis munera liberalius et libencius exhibeantur capituli nostri Sarr accedente assensu de ecclesia de Winterborn Sureveton vestri patronatus taliter duximus ordinandum Videlicet quod Hosberto nunc rectore eiusdem cedente vel decedente decima garbarum tocius parochie eiusdem pratum dominicum et mansus capitalis ecclesie predicte quem tamen vicarius eiusdem precario tenebit donec in alio manso conpetenti eidem provideritis in usus vestros proprios et perpetuos cedere debeant in futurum residuo fructuum ecclesie memorate ad perpetuum ipsius vicarium pro tempore futurum qui extraordinariis oneribus inter vos et ipsum pro rata porcionum vestrarum parciendis onera ordinaria eidem ecclesie incumbencia sustinebit nomine vicarie perpetue spectaturo in qua nobis et successoribus nostris de assensu vestro ius patronatus reservamus Interim vero duas marcas annuas a prefato rectore in beati Michaelis et Resurrectionis dominice festis pro equalibus porcionibus percipiendas de eiusdem rectoris assensu ecclesie ipsius pensionis nomine vobis duximus constituendas Ut autem hec ordinacio nostra perpetue firmitatis robur optineat presens scriptum tam sigillo capituli nostri Sarr quam nostro fecimus consignari Hiis testibus domino Roberto decano Sarr magistro Rogero precentore magistro Radd[ulfo] cancellario domino Henrico thesaurario Sarr magistris Egidio archidiacono Berksir et Stephano archidiacono Sarr magistro Radd[ulfo] de Eboraco Thoma de la Wile Waltero de la Wile Petro de Cumb Galfrido de Bedeford canonicis Sarr magistro Ricardo de Bienham Petro de Wimborn capellano magistro Rogero de la Grene Roberto de Wichampton et aliis Dat v kl Ianuarii pontificatus nostri anno terciodecimo