Charter Document - 03390029

Omnibus sancte matris ecclesie filiis presens scriptum visuris vel audituris Robertus dei gratia Sar episcopus et eiusdem loci capitulum salutem in domino eternam Ad universitatis vestre notitiam volumus pervenire quod cum mota fuisset controversia super iure patronatus ecclesie de Estn inter abbatem et conventum de Monte Sancte Katerine iuxta Rotomag[um] ex una parte asserentes ius patronatus dicte ecclesie de Estn spectare ad ecclesiam suam ex collatione Anselmi Marscalli et inter priorem et conventum de Bradenestok ex altera asserentes ius patronatus dicte ecclesie de Estn spectare ad domum suam de Bradenestok ex dono bone memorie W Marscalli senioris domino Stephano de Tissebir tunc archidiacono Wiltesir et rectore dicte ecclesie de Estn legittime constituto procuratore ex parte dictorum abbatis et conventus Rotomag ad totum dictum negotium expediendum per litteras suas patentes et continentes etiam se contulisse eidem S procuratori suo totum ius patronatus quod habuerunt in dicta ecclesia salva sibi quadam antiqua pensione duodecim solidorum annuatim in eadem villa de Estn solvendorum a rectoribus eiusdem ecclesie de Estn tandem in hunc modum dicta controversia conquievit Videlicet predicte partes in presentia nostra constitute totum ius quod dicebant se habere in supradicta ecclesia de Estn unanimiter ordinationi nostre commiserunt ratum et gratum habiture absque omni exceptione quicquid nos secundum deum in dicto negocio dignum duxerimus ordinandum Nos igitur deum pre oculis habentes et universalis ecclesie utilitati providentes et animarum saluti consulere volentes in hunc modum ordinavimus scilicet quod predicta domus de Bradenestok habebit et possidebit libere et pacifice in perpetuum omnes decimas bladi feni et casei de dominico dictorum prioris et conventus de Bradenestok apud Estn collato eidem domui a Iohanne Marscallo seniore cum corpore suo exceptis decimis vilenagii prioris et conventus de Bradenestok in villa de Estn in dominicum eorum prius conversi et in posterum convertendi Totum autem residuum decimarum scilicet oblationum et obventionum et omnium aliorum de iure ad dictam ecclesiam de Estn spectancium eidem ecclesie remanebit ut prius Que ecclesia cum omni integritate sua exceptis decimis supradictis bladi et feni et casei de predicto dominico prioris de Bradenestok in Estn quas dicta domus percipiet ut diximus cedet in usus cuiusdam hospitalis quod deo auctore in dicta villa de Estn construetur ad suscipiendum pro facultate sua transeuntes hospicio indigentes et ad sustentacionem trium sacerdotum ibidem in perpetuum deo ministrancium sub habitu decenti quorum unus celebrabit pro defunctis alius missam de Domina cantabit tertius de die quo constructo supradictus S archidiaconus et heredes sui vel hii quibus assignare voluerit nobis et successoribus nostris successive aliquem trium capellanorum qui ad gubernationem dicti hospitalis et totius parochie idoneus sit presentabunt tanquam magistrum et rectorem dicti hospitalis Cui hospitali divine pietatis intuitu concedimus et auctoritate pontificali confirmamus dictam ecclesiam cum omnibus pertinentiis suis et libertatibus habendam et tenendam libere quiete et pacifice in proprios usus in perpetuum salvo tamen in omnibus iure et auctoritate episcopali et archidiaconi loci et ecclesie Sar et salvis prefatis priori et conventui de Bradenestok omnibus predictis decimis scilicet garbarum feni et casei omnino ut prescriptum est Et quia renunciatum fuit utrimque impetratis et impetrandis instrumentis et omnibus dictam controversiam tangentibus decrevimus de consensu dictarum partium illa et omnia alia si qua inventa fuerint huic nostre ordinationi obviancia nullius de cetero fore vigoris Ut hec autem nostra ordinatio et concessio rata et stabilis in perpetuum permaneat huic scripto una cum sigillo capituli Sar sigillum nostrum apposuimus Hiis testibus magistro Radulfo tunc officiali episcopi Sar magistro Clemente de Melcheburn Willelmo et Petro de Cumb clericis Ricardo et Waltero capellanis domino Galfrido de Otteford et multis aliis