Charter Document - 03390018
| Charter Number: | 03390018 |
|---|---|
| Cartulary Title: | Salisbury 1229-1262 Volume 36 |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1237 |
| Date type: | Internal, A.D. |
| Resource Link(s): |
|
Charter:
Noverint omnes Cristi fideles ad quorum noticiam presens scriptum pervenerit quod de assensu domini R Sarr episcopi anno domini MCCXXXVII facta est hec compositio realis et perpetua inter abbatem et conventum de Becco per fratrem W de Guinevill procuratorem eorum in Anglia generalem ex una parte et Galfridum rectorem ecclesie de Devrel ex altera Videlicet quod cum ab eodem Galfrido suo nomine et ecclesie sue de Devrel a dictis abbate et conventu et ecclesia sua Beccensi petite essent decime minute provenientes de tota pastura que quondam fuit W Pipard et decime provenientes de una acra terre quam Martinus de Wodecunbe aliquando tenuit et decime provenientes de ovibus W porcarii et decime provenientes de terra que fuit Margarete de Wodecu[n]be item cum petite essent ab eo alie res scilicet pastura ad octo boves et ad opus porcorum suorum et communicatio in prato dominorum post amotionem fenorum et a manso quod fuit W Pipard panis ad panem benedictum faciendum et alie minute obventiones tandem contentiones inter dictas partes et ecclesias orte sub hac amicabili forma perpetua et reali finem susceperunt perpetuum Scilicet quod dictus procurator ad componendum datus nomine dictorum abbatis et conventus concessit dictis G rectori successoribusque suis et ecclesie de Devrel in redemptionem et recompensationem dictarum decimarum minutarum dicte pasture Pipard tres solidos annuos infra octabas sancti Iohannis Baptiste a procuratoribus de Okeburn qui pro tempore fuerint singulis annis apud Devrel percipiendos et quod dictus rector et successores sui in dicta pastura de Wodecunbe perpetuis temporibus habeant pasturam octo boum cum bobus monachorum per sex ebdomadas et pasturam porcorum suorum de proprio alimento procedentium cum porcis ipsorum monachorum post amotionem garbarum et decimas ovium et aliarum rerum dicti W porcarii secundum quod consueverant percipere et de terra que fuit dicte Margarete eodem modo Dictus autem G rector pro se et successoribus suis predictis monachis et ecclesie sue remisit et perpetuo quietas clamavit omnes decimas quas petebat de assarto dictorum monachorum in Wodecu[n]be et decimas de predicta acra quam possedit dictus Martinus et exactionem panis et aliarum minutarum obventionum de manso dicti W Pipart Et ut hec compositio rata et inviolabilis in perpetuum perseveret dicti W procurator et G rector dicte ecclesie de Devrel huic scripto ad modum cirographi confecto signa sua alternatim apposuerunt Et ad maiorem securitatem dominus R tunc temporis episcopus Sarr prefatam compositionem ad instantiam partium auctoritate pontificali duxit confirmandam salva sibi et successoribus suis partem contra hanc compositionem venientem cohercendi cum opus fuerit potestate