Charter Document - 03380147
| Charter Number: | 03380147 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Conversion |
| Date: | 1269 |
| Date type: | Internal, A.D., Calendar |
| Resource Link(s): |
|
Charter:
Universis sancte matris ecclesie filiis ad quos presens scriptum pervenerit Iohannes permissione divina Herefordensis ecclesie minister humilis eternam in domino salutem Noverit universitas vestra quod nos de assensu consilio et voluntate capituli nostri Hereford appropriamus et apprebendamus abbati et monachis Lyren duas porciones ecclesiarum quas habent in diocesi nostra cum capellis salvis eius pertinenciis videlicet duas porciones ecclesie de Markeleia duas porciones ecclesie de Fawehope et duas porciones ecclesie de Wilton et duas porciones ecclesie de Thudeham et duas porciones ecclesie de Erleslen et duas porciones ecclesie de Themedebur et duas porciones ecclesie de Fonte David salva sustentacione vicariorum in dictis ecclesiis videlicet tercia parte prout in instrumentis antecessorum nostrorum continetur Ita videlicet quod decedentibus earundem ecclesiarum vicariis liceat eis ad vicarias dictarum ecclesiarum vicarios ydoneos eligere et nobis vel successoribus nostris presentare Ita quod possessio dictorum monachorum quantum ad duas partes per decessum vicariorum in nullo perturbetur nec aliqua in eis fiat sequestratio Vicarii vero onera ecclesiarum quantum ad episcopalia et archidiaconalia sustinebunt Hoc tamen notato quod si episcopo Herefordn procurationem in aliqua dictarum ecclesiarum habere debeat monachi Liren pro procuratione illa episcopali in solidum respondebunt Abbatem autem Liren quantum ad dictarum ecclesiarum appropriationem et apprebendationem de assensu capituli nostri canonicum Herefordn ecclesie constituimus assignantes eidem stallum in choro et locum in capitulo et in predicta ecclesia vicarium habebit nomine suo ministrantem qui panem et servisiam de communi percipiet Si vero predictus abbas vel generalis procurator monachorum Liren ad ecclesiam Hereford accesserit panem et servisiam que vicarius eius eo absente consuevit percipere dum presens fuerit percipiet Predictus vero abbas quamdiu in ecclesia nostra presens extiterit obventionibus ad altare maius provenientibus plene ut canonicus communicabit Preterea ad confederationem fraternitatis habite et habende inter ecclesiam Herefordns et monasterium Liren si contigerit abbatem de Lira vel aliquem fratrem eiusdem loci diem ultimum claudere et nobis nunciatum fuerit nomina defunctorum in nostro ponentur martirilogio ut in anniversariis diebus suis servicium defunctorum pro eis sicut pro canonicis nostris fiat et si episcopum vel canonicum Herefordn ecclesie decedere contigerit fiat pro eis in monasterio Liren in missis orationibus et aliis suffragiis sicut per abbatem vel monacho in monasterio Liren defuncto Capitulum vero Herefordense cum inde fuerit requisitum in negociis abbatis et monachorum de Lira manum consilii et auxilii sumptibus dictorum monachorum porrigere tenetur et ecclesie sue iura pro posse tueri et conservare Ut hec igitur nostra ordinacio robur firmitatis optineat eam sigilli nostri et capituli nostri inpressione fecimus roborari Nos itaque Iohannes decanus Herefordensis et eiusdem loci capitulum omnia et singula premissa unanimi consensu nostro rata habemus et firma Dat anno domini millesimo ducentesimo sexagesimo nono mense Iunii