Charter Document - 03380137
| Charter Number: | 03380137 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1269 |
| Date type: | Internal, A.D., Feast |
| Resource Link(s): |
|
Charter:
Universis sancte matris ecclesie filiis ad quos presentes littere pervenerint Iohannes permissione divina Herefordensis ecclesie minister humilis salutem in domino sempiternam Cum nos nuper litteras bone memorie domini Radulphi predecessoris nostri inspexerimus inter cetera continentes quod ecclesiam de Dudelebur cum omnibus suis pertinenciis et capellis divine pietatis intuitu deo et ecclesie nostre Herefordensis et capitulo nostro loci eiusdem contulit de cuius ecclesie proventibus ordinavit viginti marcas sex vicariis in ecclesia Herefordensi continue residentibus annuatim pro rata conferendas nos vero dictam collationem et ordinationem ratam et gratam habentes pro salute anime nostre et pro animabus patris et matris nostre ac predecessorum et successorum nostrorum dicto capitulo nostro concedimus et donamus dictam ecclesiam in usus proprios convertendam in hunc modum videlicet quod dicti sex vicarii continue horis et matutinis in ecclesia nostra Herefordensi intersint et ad hoc faciendum per iuramentum cum admissi fuerint distringantur et quod omnem diligenciam apponent quod infra annum antiphonarium sciant et psalterium cordetenus et quod duo ex ipsis sint capellani duo diaconi et duo subdiaconi qui dictas viginti marcas per manus dicti capituli nostri plenaria duobus anni terminis videlicet in festo beati Michaelis et annuntiationis dominice percipiant Ita quod dicti duo capellani percipiant novem marcas duo diaconi sex marcas et dimidiam et duo subdiaconi quatuor marcas et dimidiam Si autem contingat quod aliquis capellanorum qui modo habet portionem diaconi vel subdiaconi in ecclesia cedat vel decedat vel pinguius beneficium admittat ex tunc volumus ipsam portionem vacare et sub pena excommunicationis inhibemus ne alii quam diacono vel subdiacono conferatur prout dicta portio requirit et sic de cetero inviolabiliter observetur Volumus etiam et ordinamus quod in eadem ecclesia de Duddelbur fiat vicaria estimationis triginta marcarum que omnia onera dicte ecclesie de Duddelbur cum capellis quocumque casu contingentia tam in pensione abbatis Sancti Martini Saginensis quam in aliis pensionibus et episcopalibus et archidiaconatibus sustinebit et eidem ecclesie et capellis per idoneos ministros honeste faciet deservire Et quod annuatim obitus noster celebriter teneatur in ecclesia Herefordensi et canonici qui exequiis dicti obitus personaliter interfuerint quinque marcas de fructibus ipsius ecclesie percipiant et clerici viginti solidos Volumus etiam et ordinamus quod quicquid emolumenti ultra dictas quinquaginta sex marcas et dimidiam de dicta ecclesia poterit provenire cedat in usus canonicorum nostrorum Hereford qui horis diurnis et precipue maiori misse personaliter interfuerint et eis in fine misse qui presentes fuerint equaliter distribuatur Ita tamen ut qui misse non interfuerit nichil percipiat Ut autem hec nostra concessio donatio et ordinatio rata et inconcussa inperpetuum permaneat presentes litteras sigillo nostro fecimus sigillari Datum die lune in crastino sanctorum Marcellini et Petri pontificatus nostri anno primo