Charter Document - 03380128
| Charter Number: | 03380128 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1271 |
| Date type: | Internal, A.D., Feast |
| Resource Link(s): |
|
Charter:
Memorandum quod convenientibus venerabilibus patribus dominis Nicholao Wintoniensi suffraganeorum Cantuariensis provincie subdecano Rogero Coventrensi et Lichefeldensi Waltero Exoniensi Willelmo Bathoniensi et Wellensi Godefrido Wygorniensi et Iohanne Herefordensi episcopis anno domini MCC septuagesimo apud Rading in crastino dominice qua cantatur Letare Ierusalem ad tractandum super indempnitatibus suis et suarum ecclesiarum ac suorum subditorum et precipue ecclesie sue metropolitane sedis Cantuariensis necnon super hoc quod sede metropolitana vacante monachi ecclesie Christi Cantuariensis usurpare nituntur in personis et ecclesiis suffraganeorum episcoporum provincie Cantuariensis iurisdictionem metropolitanum contingentem quam nunquam hactenus obtinuerunt in non modicum preiudicium dictorum suffraganeorum ecclesiarum suarum et subditorum suorum falces suas in messes alienas mittere indebite attentantes nichil iuris ex hoc commodi seu honoris futuro metropolitano attribuentes seu adquirentes licet per hoc colore quesito presumptionem suam querant palliare unanimi consensu dictorum dominorum convenit ne quod inter eos salubriter et unanimiter statutum fuerit ordinatum seu provisum super premissis tractu temporis aliquorum vel alicuius dissensu valeat in irritum vel ad iniquum revocari videlicet ut quod ab omnibus statutum fuerit ab omnibus equanimiter supportetur et onere equali sustentetur et sub fidei religione securitas legitima de inviolabili communis eorum provisionis observatione prestetur salva in omnibus auctoritate sedis apostolice et metropolitani Cantuariensis Ad que omnia et singula premissa fideliter et plenarie observanda singuli predictorum dominorum episcoporum sese ad invicem obligarunt bona fide promittentes se omnia et singula predicta observaturos pro viribus suis et impleturos et super sumptibus circa deffensionem predictorum factis si quos fieri contingat pro rata seu portione quemlibet eorum contingente plenarie satisfacturos In cuius rei testimonium huic presenti memorando dicti domini episcopi sigilla sua fecerunt apponi