Charter Document - 03380095

Memorandum quod cum mota esset controversia inter venerabilem patrem episcopum Petrum decanum et capitulum Herefordense ex parte una et cives Herefordenses homines domini regis ex altera super quibusdam libertatibus et aliis lis inter eos in forma subscripta amicabiliter convenit videlicet quod predicti cives homines domini regis quantum in eis est concesserunt pro se et heredibus suis quod predicti episcopus decanus et capitulum et canonici et eorum successores habeant in perpetuum pacifice et sine aliqua reclamatione dictorum civium vel heredum suorum assisam panis et cervisie de omnibus hominibus suis tenentibus de eisdem in capite et de omnibus aliis manentibus in eorum terris et feodis in civitate Herefordensi et in suburbio eiusdem civitatis nec dicti cives intrabunt terras vel feoda predicta pro aliquibus attachiamentis faciendis Et si contingat aliquem de hominibus dictorum episcopi decani et capituli per ballivos domini regis attachiari pro delicto assise panis et cervisie non servate restituetur de curia dictorum civium quam habent de domino rege ballivis dictorum episcopi decani et capituli cum delicto suo pro quo fuit attachiatus et in ipsorum curia iudicium suum recipiet et punietur Item predicti cives concesserunt pro se et heredibus suis prefatis episcopo decano et capitulo et successoribus suis in perpetuum sine contradictione calumpnia seu impedimento sui vel heredum aut ballivorum suorum pilloricum et tumbrellum domini regis in civitate Herefordensi tam tempore nundinarum dicti episcopi quam extra ad predicta iudicia facienda et alia cum contingerit per ballivos ipsorum episcopi decani et capituli Predictus vero episcopus pilloricum et tumbrellum que levaverat in civitate predicta unde erat contentio inter eos in curia domini regis faciet prosterni ita quod de cetero non leventur Item concesserunt dicti cives pro se et pro heredibus suis inperpetuum quod omnes homines dictorum episcopi decani et capituli et canonicorum et alii qui manent in eorum terris et feodis in civitate predicta libere emant et vendant in eadem civitate et marchandisas suas faciant et quieti sint de tolneto et de omnibus aliis exactionibus quibuscunque excepta gente de advocaria Item omnes homines forinseci dictorum episcopi decani et capituli tam liberi quam custumarii exceptis mercatoribus mercata ad marchandisas suas faciendas exercentibus in predicta civitate ad opus suum proprium libere emant omnia venalia in perpetuum et blada sua et animalia et omnia alia bona sua vendant ad placitum suum excepta venditione pannorum per ulnas et quieti sint de tolneto et omnibus aliis exactionibus Et cum dubium fuerit qui sint mercatores de hominibus predictis credatur eis super hoc per solam affidationem suam sine aliqua alia difficultate Item concesserunt dicti cives pro se et heredibus predictis episcopo decano et capitulo et successoribus suis quod mercatores tenentes de feodis suis manentes in villis de Bromyard Ledebur Ros et Preston libere emant in civitate predicta sicut ante istam concordiam facere consueverunt ita quod pro marchandisis suis quieti sint de tolneto et omnibus aliis exactionibus Item predicti episcopus et decanus et capitulum concesserunt pro se et successoribus suis quod a die quo hec concordia facta fuit inposterum nichil ad se attrahent de feodo domini regis set contenti erunt de terris et tenementis que habuerunt ante istam concordiam in civitate predicta inperpetuum Et si contingat decetero aliquem de predictis civibus vel eorum heredibus vel de aliis qui manent extra civitatem et habent tenementa infra eandem de feodo domini regis redditum aliquem legare ecclesie cathedrali Herefordensi de tenementis suis que sunt de feodo domini regis de eisdem tenementis nichil aliud habere debent vel poterunt predicti episcopus decanus et capitulum vel eorum successores nisi tantum predictum redditum nec occasione illius annui redditus de dictis tenementis aliquam libertatem clamare inperpetum Item mercatum coriorum transferatur ad alium locum quam nunc est de communi assensu dictorum civium et hominum domini episcopi decani et capituli et ubi melius viderint expedire in predicta civitate in perpetuum statuatur Item de muragio sic provisum est quod cum necesse fuerit claudere civitatem predictam assignetur pars aliqua muri claudenda hominibus dictorum episcopi decani et capituli et successorum suorum pro rata secundum quod maius et minus habent in civitate per visum quatuor legalium hominum neutri parti suspectorum si simul concordare non poterunt ad dictam civitatem in communi claudendam Item de mercato de Preston provideatur quod remanere possit absque indempnitate dictorum civium Et sic provisum est quod stet in die Veneris sicut nunc est vel die Mercurii ad electionem predictorum civium Item concedunt predicti cives quantum in eis est quod decanus et capitulum libere utantur in feodis suis in civitate Herefordensi et in suburbio attachiamento de infongenethef secundum quod continetur in carta quam habent de domino rege Item porte omnes civitatis communes sint predictis episcopo decano et capitulo canonicis et eorum hominibus ad liberum introitum et exitum habendum sine impedimento civium vel ballivorum suorum Et concessum est ex utraque parte quod procurabunt quod cyrographum fiat super omnibus predictis in curia domini regis In cuius rei testimonium huic scripto in modum cyrographi confecto partes alternatim sigilla sua apposuerunt Et cyrographo super premissis facto in curia domini regis cuilibet dictarum partium pars altera presentis scripti cum sigillis propriis restituetur Actum apud Herefordiam die Martis in septimana Pasche anno domini MCCLX secundo coram dominis Roberto Waleron et Nicholao de Turri iusticiariis a domino rege deputatis