Charter Document - 03380089

Universis Cristi fidelibus presens scriptum visuris vel audituris Petrus miseratione divina Herefordensis ecclesie minister humilis eternam in domino salutem Noverit universitas vestra quod nos dedimus concessimus et hac presenti carta nostra confirmavimus deo et beate Marie ac beato Ethelberto martiri omnibusque sanctis dei et decano et capitulo Hereforden in puram et perpetuam elemosinam pro salute anime nostre et pro animabus antecessorum et successorum nostrorum episcoporum et pro anima felicis recordationis [] quondam prioris Campanie et pro animabus omnium parentum et benefactorum nostrorum omniumque fidelium defunctorum septem carucatas terre quas acquisivimus in manerio et parochia de Hamme Lacy videlicet terras quas emimus ab abbate et conventu de Lavenden et terram quam emimus a magistro Willelmo de Bathon clerico nostro et terras quas emimus a [] priore de Crassewelle et eiusdem loci fratribus ordinis Grandimonten cum capitali mesuagio et aliis mesuagiis grangiis et omnibus aliis edificiis et cum redditibus nemoribus et molendinis gardinis vivariis piscariis stagnis rivariis pratis pascuis viis semitis et omnibus aliis aisiamentis et omnibus homagiis libere tenentium et non libere tenentium et specialiter cum homagio domini Henrici de Bradel et heredum suorum et cum omnibus exitibus et profectibus et omnibus aliis rebus et libertatibus et liberis consuetudinibus tam nominatis quam non nominatis ad omnes predictas terras pertinentibus salvo nobis et successoribus nostris de dictis terris antiquo servitio debito et consueto Dedimus etiam et concessimus eodem modo dictis decano et capitulo quatuor libr sterlingorum annui redditus quas debent nobis [] prior et conventus Sancti Guthlaci Hereford pro molendinis Hereforden que emimus et eisdem ad firmam perpetuam concessimus Et quia pium est pauperibus in necessitatis tempore obvenire volumus et de consensu predictorum decani et capituli ordinamus quod pro predictis omnibus iidem decanus et capitulum ducentas et quadraginta summas duri bladi videlicet boni mixtilionis annuatim pauperibus erogent et in pane distribuant in domo episcopali Hereforden duobus anni mensibus in Iunio scilicet et Iulio ita quod dicta distributio fiat ter in qualibet septimana duorum mensium predictorum et cuilibet pauperi venienti detur qualibet ipsius distributionis panis tante quantitatis quod ex ea possit per unam diem commode sustentari et in qualibet septimana dictorum mensium durante dicta distributione fiat provisio competens et sufficiens per unam diem in pane fratribus minoribus Hereford residentibus et si forte contigerit tantam multitudinem pauperum ad distributionem supradictam confluere quod non posset distributio usque ad finem dictorum mensium perfici ut est dictum fiat secundum formam predictam quamdiu sufficiet dictum bladum Et si quid post dictos duos menses de dicto blado residuum fuerit distribuatur in subsequentibus septimanis Volumus etiam et ordinamus quod fratribus de Crassewelle quingente marce solvantur de pecunia nostra si quitare voluerint et quitaverint iura et actiones si que eis tunc petunt in rebus superius nominatis quod nisi fecerint dicti fratres et terras quas ab eis emimus evicerint de dictis quingentis marcis emantur terre equivalentes et loco terrarum predictarum subrogentur pro quibus quingentis marcis eisdem decano et capitulo omnia bona nostra mobilia obligamus et quousque terre predicte empte fuerint vel commode emi potuerint detrahatur de distributione supradicta quantum secundum estimationem bonorum virorum fuerit detrahendum Volumus etenim et de consensu predictorum decani et capituli ordinamus quod quotienscumque garda vel maritagium aut utrumque heredum vel successorum domini Henrici de Bradele ad eosdem decanum et capitulum devenerit quoquo modo medietas totius emolumenti ipsorum guarde vel maritagii aut utriusque cedat eisdem decano et capitulo pleno iure ut in hoc saltem si super premissis in aliquo gravati fuerint releventur alia vero medietas applicetur fabrice et refectioni ecclesie Hereford cathedralis Et ut liberius et libentius memorati decanus et capitulum adimpleant et perficiant supradicta volentes in beneficiis nostris excrescere quadraginta et duos boves quod in dicto manerio habebamus cum curribus quadrigis et carucis ibidem ad presens existentibus eisdem dedimus et concessimus cum predictis et hac vice expensis nostris faciemus terras que seminande fuerint seminari Ipsi vero decanus et capitulum primo supradictam distributionem facient anno ab incarnatione domini millesimo ducentesimo quinquagesimo octavo et postea quolibet anno imperpetuum prout est superius ordinatum In cuius rei testimonium sigillum nostrum presentibus apposuimus Dat mense septembris anno domini millesimo ducentesimo quinquagesimo sexto