Charter Document - 03380058
| Charter Number: | 03380058 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1245 |
| Date type: | Assigned |
| Resource Link(s): |
|
Charter:
Excellentissimo domino suo et benefactori Henrico dei gratia regi Anglie domino Hybernie duci Aquitanie comiti Andegavie Petrus eiusdem miseratione Herefordensis ecclesie minister humilis se ipsum ad votum cum debito famulatu Ad vestrum credimus honorem cedere et profectum si vir illustris dominus comes Sabaudie districta passagia sue terre a vobis in homagium et studium recipiat volens inde pro vobis et vestris facere contra omnes homines guerram et pacem et forte elicias reddere vestro nuncio cum celsitudini vestre videbitur expedire prout omnia ista et plura alia ad hanc materiam facientia de mandato eiusdem comitis coram toto vestro consilio aliquando exposuimus viva voce Ea de causa serenitatem vestram rogamus quantum possumus bona fide si vobis placet nihilominus consulentes quatenus deliberato consilio in hoc facto et alibi ubi poteritis amicos et subditos acquirere studeatis qui suo loco et tempore inimicorum vestrorum superbiam iniquitatem et maliciam vice vestra ut decet tantum principem strenue possint repellere et cum aviditate animi refutare Mittet enim ad vos dominum Willelmum Bonivardi virum honestum et in negotiis plurimum circumspectum qui nomine dicti comitis vestram perficiet omnimodo voluntatem Ad hec noveritis nos esse in terra nativitatis nostre paratos pro vobis exponere nos et nostra sine omni distinctione et differentia si nobis duxeritis iniungendum