Charter Document - 03380015
| Charter Number: | 03380015 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Appropriation |
| Date: | 1237 |
| Date type: | Internal, Calendar |
| Resource Link(s): |
|
Charter:
Universis sancte matris ecclesie filiis Radulphus dei gratia Herefordensis episcopus eternam in domino salutem Ad universitatis vestre notitiam volumus pervenire quod cum ius patronatus et ordinatio plenaria ecclesie de Duddelbir ad nos spectare manifestum fuerit Osberto quondam eiusdem rectore eandem ecclesiam in manus nostras coram capitulo Herefordensi voluntarie resignante Willelmo quoque clerico quondam vicario ipsius ecclesie resignante suam vicariam in manus nostras coram eodem capitulo de predicta ecclesia post utriusque resignationem ordinavimus in hunc modum In primis zelo domus domini ducti memoratam ecclesiam de Duddelbir cum omnibus suis pertinentiis et capellis divine pietatis intuitu contulimus deo et matrici ecclesie nostre Herefordensi et capitulo nostro Herefordensi in sustentationem vicariorum qui eiusdem ecclesie Herefordensis servitio continue insistent convertendam qui videlicet vicarii per decanum et capitulum predictum de nostro quidem consensu et successorum nostrorum in perpetuum futuris temporibus substituentur statuentes ut decem marce quas annuatim solvere tenetur capitulo Herefordensi pro firma sepe dicte ecclesie de Duddelbir Osbertus clericus et sexaginta solidi quos pro annua firma portionis eiusdem ecclesie reddere debet eidem capitulo Willelmus de Duddelbir quondam illius ecclesie vicarius ad sustentationem duorum capellanorum et duorum diaconorum servientium in ecclesia Herefordensis deputentur Ut duo scilicet capellani centum solidos duo vero diaconi septem marcas annuatim equali percipiant portione certis temporibus a decano et capitulo Herefordensi prout a nobis ac eodem capitulo melius fuerit provisum Post decessum vero supradicti Osberti et memorati Willelmi qui firmarii sunt perpetui ut dictum est de sepe dicta ecclesia de Duddelbir sic ordinamus ut ecclesia Herefordensis ad usus predictos in perpetuum annuatim de eadem ecclesia de Duddelbir per totum percipiat viginti marcas ita videlicet ut stante ordinatione superius expressa de duobus capellanis et duobus diaconis addantur eisdem duo subdiaconi qui de quinque marcis et dimidia residuis equaliter sustententur Vicarius vero qui pro tempore a nobis vel successoribus nostris in ecclesia de Duddelbir post decessum dictorum Osbertus et Willelmo instituetur omnia onera ecclesiam de Duddelbir quocumque casu tangentia tam in pensionibus quam in aliis episcopalibus et archidiaconatibus et in eiusdem ecclesie de Duddelbir servitio et cura per omnia sustinebit sine aliqua diminutione viginti marcarum predictarum que semper integre et libere ad usus vicariorum ut prescriptum est deputabuntur Et ut hec nostra collatio ordinatio et provisio inperpetuum firma et stabilis permaneat eam coram Stephano decano et capitulo Herefordensis recitatam et unanimi assensu approbatam sigilli nostri attestatione fecimus roborari Nos quoque Stephanus decanus et capitulum Herefordensis dictam collationem et ordinationem ratam et gratam habentes ad maioris roboris securitatem et perpetuam firmitatem una cum sigillo venerabilis patris predicti domini Radulfi episcopi nostri sigillum nostrum presenti scripto apposuimus Actum anno incarnati verbi millesimo ducentesimo tricesimo septimo mense maio