Charter Document - 03380012
| Charter Number: | 03380012 |
|---|---|
| Cartulary Title: | Hereford 1234-1275 Volume 35 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1237 |
| Date type: | Internal, A.D., Calendar |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Radulfus dei gratia Herefordensis episcopus eternam in domino salutem Noverit universitas vestra nos recepisse a magistro Thoma Foliot thesaurario Herefordie executore bone memorie domini H predecessoris nostri quondam Herefordensis episcopi sex viginti libras sterlingorum ad terras episcopatus seminandas in utroque tempore seminandi et carucas cum stauro quales in episcopatu fuerunt relicte Et quia volumus ut tantum beneficium nobis collatum futuris temporibus prosit ecclesie nostre Hereford promittimus nos tantundem pecunie successori nostro relicturos nisi fuerint terre tempore nostri decessus seminate Quod si forte disponente Domino contingat nos in fata decedere citra autumpnum terris seminatis volumus quod fructus autumpni sequentis cedant in usus successoris nostri cum carucis stauro suppellectibus ad culturam terre convenientibus privilegio domini regis episcopis Anglie concesso non obstante nullo etiam testamento a nobis aliquando faciendo huic nostre ordinationi voluntati et promissis preiudicante Volumus etiam et ordinamus quantum in nobis est ut omnes successores nostri futuri episcopi in ecclesia Herefordie ad simile beneficium quale a nobis relictum fuerit in perpetuum obligentur Et in huius rei testimonium decano et capitulo nostro Hereford litteras has patentes direximus volentes et petentes ut ab eodem capitulo hec nostra ordinatio confirmetur Actum anno domini MCC tricesimo septimo mense Mayo