Charter Document - 03370033

Universis Cristi fidelibus Willelmus divina miseratione Wigorn ecclesie minister eternam in Domino salutem Ad universitatis vestre volumus pervenire notitiam quod cum questio que vertebatur inter dilectos filios nostros abbatem et monachos Winchecumbe et Robertum de Chedeleswrthe personam ecclesie de Sireburn et Robertum de Heseleia perpetuum eiusdem ecclesie vicarium super unam hidam terre quam Ricardus presbiter tenuerat per laicum servitium in villa de Sireburn in presentia nostra diutius actitata fuisset monachis asserentibus terram ipsam ad laicum feudum suum predicte Sireburne pertinere clericis vero econtra proponentibus ipsam ad ecclesiam suam de Sireburn spectare debere comperto tandem ex assertione et testimonio prudentium virorum et fide dignorum quod terra ipsa non ad ecclesiam de Sireburn set ad laicum feudum monachorum pertineret clerici predicti in presentia nostra constituti universo iuri quod se in terra ipsa nomine ecclesie de Sireburn habere dixerant gratis et sine omni coactione renuntiaverunt et prenominatis abbati et monachis omnem questionem remiserunt et terram ipsam eis quietam clamaverunt Deinde vero idem abbas et monachi cum immunitatem haberent a prestatione decimarum de terris que sunt in dominio suo iuxta consilium et dispositionem nostram pro bono pacis inter ipsos et successores eorum de cetero plenius conservando plenam bladi et prati et omnium que decimari debeant decimationem eiusdem hide ecclesie de Sireburn inperpetuum concesserunt Ut autem hec que coram nobis gesta sunt perpetuum firmitatis robur optineant ea presenti scripto commendare et sigilli nostri appositione curavimus roborare Hiis testibus Radulfo et Gar capellanis magistro Willelmo de Tunebrige magistro Petro de Lech Richardo de Lond magistro Godefrido Willelmo filio Godefridi Hugone de Poiwik Iohanne de Draiton clericis nostris Iordano persona de Stanton Reginaldo de Sudleg et multis aliis