Charter Document - 03370022
| Charter Number: | 03370022 |
|---|---|
| Cartulary Title: | Worcester 1186-1218 Volume 34 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1186 - 1190 |
| Date type: | Assigned |
| Resource Link(s): |
|
Charter:
Universis sancte matris ecclesie filiis Willelmus divina miseratione Wigorn episcopus salutem in Domino Noverit universitas vestra quod cum contentio mota fuisset inter dilectos filios nostros abbatem et canonicos de Oseneya qui gerunt personatum ecclesie de Beibire et nobilem dominam Margaretam de Buhun super capella de Berdesleye ipsis asserentibus eam ad ecclesiam suam de Beibire de qua predicta capella oleum et crisma suscipit omnino pertinere ea econtrario affirmante ius advocationis in eadem capella ad ipsam pertinere tandem in presentia nostra hoc fine conquievit Prefata siquidem domina iam dicte ecclesie de Beibire et canonicis duas acras de dominico suo unam scilicet de frumento alteram de avena ad electionem canonicorum singulis annis in autumno percipiendas concessit ita quod nec etiam decimationem earumdem acrarum rector capelle accipiet Preterea medietatem decimationum duarum virgatarum quarum una fuit Radulfi palmarii et altera Willelmi pincerne de qua controversia ante fuerat inter predictos canonicos et rectorem eiusdem capelle canonici percipient sicut ante soliti erant de toto villenagio eiusdem ville Canonici vero prefate domine concesserunt ut ipsa et heredes sui ius presentandi personam ad eandem capellam sine omni eorum reclamatione inperpetuum habeant ita quod quecunque persona per temporum successionem ab ea vel heredibus eius presentata fuerit sepedicte ecclesie de Beibire et canonicis coram episcopo iuramentum prestabit predictam conventionem inviolabiliter observandi Nos autem hanc conventionem sicut rationabiliter facta est ratam habentes eam presentis scripti serie et sigilli nostri appositione confirmamus Hiis testibus Radulfo et Garino capellanis nostris magistro Godfrido de Gloec magistro Willelmo de Tunebr Willelmo filio [] Hugone de Poiwic Iohanne clerico de Kemesia