Charter Document - 03360230
| Charter Number: | 03360230 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1164 - 1173 |
| Date type: | Assigned |
| Resource Link(s): |
|
Charter:
R[ogerus] Dei gratia Wigorn episcopus et R[icardus] Pictavensis archidiaconus omnibus fidelibus ecclesie salutem Cum ex delegata nobis cognitione a domino papa suscepissemus causam que vertebatur inter monachos Wigorn ecclesie et Thomam clericum super quibusdam decimis ecclesie de Wlvardel cognoscendam et terminandam coram nobis tandem huiusmodi compositionem fecerunt Videlicet quod predictus Thomas ecclesiam de Wlfard nomine monachorum possidebit in perpetuum cum omnibus pertinentiis suis tam in terris quam in decimis exceptis decimis de dominio monachorum Ipse autem Thomas nomine ecclesie de Wlfard pensionem duarum marcarum solvet monachis singulis annis et tertiam marcam pro tertia parte decimationis totius ville que ab antiquo pertinere dinoscitur ad ministerium camerarii Wig ecclesie Predictam autem pensionem trium marcarum ad iiii terminos solvet decem solidos in Annuntiatione sancte Marie in Martio et decem in Nativitate sancti Iohannis Baptiste et x in festivitate sancti Michaelis et decem ad festum sancti Andree Ipse autem Thomas omnia scripta sua que habuit contra monachos eis reddet Hiis testibus []