Charter Document - 03360218
| Charter Number: | 03360218 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1177 |
| Date type: | Internal, A.D., Calendar |
| Resource Link(s): |
|
Charter:
Universis sancte matris ecclesie filiis Rogerus Dei gratia Wygorn ecclesie minister salutem Manifeste improbitatis est litem iudicio decisam in questionem deducere et per quietis impatientiam controversias sopitas in nova litigia suscitare Unde omnium cognitioni duximus innotescendum nos ex prima commissione Alexandri Pape III cause decisionem que vertebatur inter dilectum nostrum Ricardum Barre Lexov archidiaconum Sar ecclesie canonicum et Alanum de Husseburn super ecclesia de Burebur que ad prebendam Sar spectare dinoscitur appellatione cessante per manum eiusdem Alani contra venerabilem fratrem nostrum I[ocelinum] Sar episcopum et nomine non expresso contra ipsum qui ecclesiam non tenebat Ricardum scilicet Lexov archidiaconum et deinde ex secunda commissione pro eodem archidiacono literas domini pape ab ipso archidiacono suscepisse Cuius cause prosecutioni cum debita diligentia insistentes post litem sollempniter contestatam prescripte cause merita longa deliberatione et districta veritatis inquisitione examinavimus Demum elapso fere biennio post plurima edicta peremptoria per ampliora quam canones et leges indulgeant intervalla constituta diem peremptorium partibus prefiximus ad quem memoratus Alanus nec venit nec pro se responsalem dirigere curavit Cum itaque prius de causa ita dicta sufficienter esset altercatum et publicatis attestationibus dictioni in testes et dicta testium utrobique esset renunciatum assidentibus nobis venerabilibus fratribus nostris Roberto Hereford et Petro Menev episcopis et aliis plurimis viris discretis et honestis tam ecclesiam Sar quam prefatum archidiaconum eiusdem ecclesie canonicum a petitione Alani prenominati super ecclesia de Bureb per sententiam absolvimus et eidem Alano super ipsa ecclesia perpetuum silentium auctoritate apostolica freti imposuimus Ne igitur temerarie presumptioni cuiusquam revocare aut quolibet modo perturbare [possit] quod cum tanta sollempnitate et summe sedis auctoritate constat esse stabilitum quod diffiniendo statuimus sigilli nostri appositione communimus Promulgata autem est hec sententia anno Verbi Incarnati MCLXXVII apud Legam prope Wygorn xviii kaln Decembris Testibus Roberto capellano nostro Samps[one] Roberto monacho magistro Silvestro clericis nostris Rad[ulf]o Foliot et Willelmo de Stoch Waltero magistro Eustachio clericis domini Heref magistro Erardo magistro Ivone Cornub magistro Rad[ulf]o Lumbardo magistro Henrico de Rowell Ada filio prepositi de Wyg