Charter Document - 03360179
| Charter Number: | 03360179 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1174 |
| Date type: | Assigned |
| Resource Link(s): |
|
Charter:
Reverendo domino et patri suo A[lexandro] dignatione divina summo pontifici R[ogerus] Wigorn[iensis] ecclesie minister indignus tam devotam quam debitam subiectionem Pro religiosis et honestis viris abbate Glouc et fratribus eiusdem apostolatus vestri preminentie supplicamus quatinus divine miserationis intuitu et religionis respectu iustis eorum postulationibus aurem vestre benignitatis inclinare velitis et eos ab indebitis vexationibus quibus inquietantur super patronatu ecclesiarum de Wirecesbur et Laverkestok preceptionis vestre largitione immunes efficiatis maxime cum non contempnende auctoritatis munimentis et scriptis autenticis que sigillata inspeximus prescriptas ecclesias eis constet esse confirmatas quorum etiam transcripta sub sigillo nostro et venerabilis fratris nostri Landavens[is] episcopi ad vestre serenitatis discretionem duximus dirigenda ut ex eorum inspectione super iure memoratorum fratrum certior vestra reddatur sublimitas Et quia vir illustris Gilebertus de Muntfichet prenominatarum ecclesiarum advocationem per vestre dignationis rescriptum obtinere contendit cum tamen certum habeatur sepe dictas ecclesias monasterio Glouc canonice fuisse collatas priusquam pater prelibati G[ileberti] fundos in quibus ecclesie site cognoscuntur regia largitione esset consequtus vestre discussionis pater sancte perpendat districtio utrum ad singulorum dominorum que frequenter eventu humano contingunt successiones quod semel rationabiliter noscitur statutum et pontificali et regio munimine roboratum precipue cum loco religioso sit collatum iuxta persone laicalis arbitrium concuti debeat et infirmari Valeat apostolatus vester semper in Domino