Charter Document - 03360173
| Charter Number: | 03360173 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1174 |
| Date type: | Internal, A.D., Calendar |
| Resource Link(s): |
Durham Cathedral Archive - Cartulary II (f39r) Durham Cathedral Archive - Cartularium Vetus (f118r) |
Charter:
Rogerius Dei gracia Wigornensis episcopus et Johannes Exoniensis ecclesie Thesaurarius universis sancte matris ecclesie filiis presentibus et futuris ad quos presens scriptura pervenerit salutem Ne semel sopita litigia denuo suscitentur et bonum pacis contentio recidiva perturbet in publicam volumus noticiam pervenire quod controversia quam movebant Prior et fratres Dunelmenses monasterio Sancti Albani super ecclesia de Tynemuth et pertinentiis ejus cujus nobis et venerabili fratri nostro Roberto Eboracensis ecclesie Decano de mandato summi Pontificis Alexandri tercii cognitio fuit et decisio delegata sub hac forma ut si tres interesse non possemus duo nostrum in eadem causa procederent hoc tenore et ordine conquievit Videlicet quod tam venerabilis pater noster Hugo Dei gratia Dunelmensis episcopus quam supradictus Prior et totus Conventus ejusdem ecclesie liti prescripte et repeticioni ecclesie de Tynemuth et ad eam pertinencium in perpetuum renuntiarunt et ipsam ecclesiam cum universis pertinentiis suis monasterio Sancti Albani scriptis suis autenticis confirmarunt Abbas vero et fratres Sancti Albani pro bono pacis et prenominata renunciacione concesserunt ecclesie Dunelmensi ecclesiam de Biwella salvo jure Salamonis presbiteri quoad vixerit et ecclesiam de Eduluingeham salvo tenemento Ade de Dumbar et post eum Englerii clerici jure perpetuo possidendas Instrumenta autem quibus Dunelmensis ecclesia uti poterat adversus monasterium Sancti Albani ad repetendam ecclesiam de Tynemuth Prior Dunelmensis in manus nostras resignavit preter ea in quibus ecclesia de Tynemuth cum aliis possessionibus Dunelmensi fuerat ecclesie confirmata que quidem adversus transactionem istam nichil roboris aut virtutis habebunt Et monachi Sancti Albani versa vice munimenta que super ecclesiis de Biwell et de Eduluingeham habebant Priori et fratribus Dunelmensibus reddiderunt exceptis his quibus ecclesie ipse monasterio Sancti Albani cum aliis sunt possessionibus confirmate Que utique quantum ad articulum illum juribus carebunt Episcopus sane Dunelmensis intuitu et consideracione pacis istius sepe dicto Abbati tam suo quam ecclesie sue nomine indulsit ut ab ecclesiis ad ecclesiam de Tynemuth pertinentibus liceat eidem Abbati et fratribus fructus solito uberiores percipere et pensiones earum decedentibus personis presentibus supra quam prius solvere consueverant ad quadraginta marcarum summam augere Nos igitur prefato con judice nostro absente sed absentiam suam ex causis necessariis et sufficientibus excusante transactionem istam ratam habentes auctoritate nobis et potestate concessa monasterium Sancti Albani ab impeticione Dunelmensis ecclesie super jam dicta ecclesia et pertinentiis ejus imperpetuum absolvimus et prefatam transactionem cunctis temporibus decrevimus valituram Actum Warewici anno Dominice incarnationis MCLXXIIII pridie idus Novembris