Charter Document - 03360172
| Charter Number: | 03360172 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1171 |
| Date type: | Assigned |
| Resource Link(s): |
|
Charter:
[R]everentissimo domino et patri suo A Dei gratia summo pontifici sanctitatis eius servus devotus Rogerus eadem gratia Wigorn ecclesie minister licet indignus devotam cum debita subiectione salutem Presumptionis argui non timemus cum id a serenitate vestra petere decrevimus quod hinc placere debeat ex honestate hinc offensam non incurrat ex rei facilitate Pro dilecto itaque et familiari nostro magistro David de Lund viro siquidem litterato et honesto qui ecclesie Romane semper devotus extitit et personam vestram digno extollens preconio acta vestra magnificavit vestre discretionis pedes amplectimur ut iuste et nulli denegande petitiones pro eo consequi mereantur effectum Venerabilis namque frater noster G Lund episcopus considerate mediocritate immo parvitate redditus sui et viri honestate et litteratura ei decem libras argenti in archidiaconatu Middelsexie annuatim percipiendas assignavit donec eidem in pari vel ampliori beneficio ecclesiastico provideret quod et carta sua quam inspeximus confirmavit et litteris a sigillo dependentibus ut memorato magistro David solveret prefatas x libras R archidiacono Middelsexie precepit qui de mandato suo ei per biennium continuum et ultra terminis statutis persolvit Ortis autem quibusdam controversiis inter iamdictos episcopum et archidiaconum et magistrum David episcopus et archidiaconus arbitrium commutaverunt ut quod archidiaconus ante magistro David solvere consuevit deinde episcopo persolveret Archidiachono itaque a solutione magistro David cessante quod episcopus prius magistro David in debitum constituit ei ad novam gratiam revocavit Quia vero huiusmodi solutio in dampnum et detrimentum magistri David poterit converti a celsitudine vestra impetrare desideramus si quid humilitas nostra in tante maiestatis conspectus potest efficere vel zelo saltim iustitie sub urgentis districtione mandati sepedicto episcopo iniungatis ut magistro David qui sepius cum multo studio coram maiestate vestra pro eo stetit ut averteret indignationem vestram ab eo in primo beneficio ecclesiastico quod ei vacaverit x illas libras assignet cum magister David iuxta intellectum et interpretationem cartarum suarum dudum sibi credidit provideri debuisse in aliquo beneficio certiore et utique in primo quod vacaverit iuxta sepememorati episcopi promissum Plurima quidem postea vacaverunt in quorum nullo ei est provisum Interim vero donec vacaverit beneficium in quo sufficienter x libre ei recompensentur districte precipiatis predicto archidiacono ut illas de archiaconatu in quo ei constat fuisse assignatas absque vexationis molestia persolvat In huius ergo interventus pro viro digno exhibiti exauditione experiatur nostre parvitatis devotio pater reverende consuete benignitatis affectum et ne tanti viri labores alicuius tergiversatione deludantur in severitate et districtione mandati precipiatis prenominato archidiacono ut x libras quas magistro David solvere consuevit occasione et appellatione cessante integre persolvat