Charter Document - 03360161

Reverendo patri et domino Alexandro dignatione divina summo pontifici excellentie ipsius servus devotus Rogerus Wygorniensis ecclesie dictus episcopus tam devotam quam debitam prompte subiectionis et votivi famulatus reverentiam Suscepto celsitudinis vestre mandato nostre mediocritati et discreto college nostro S[imoni] abbati sancti Albani directo in cuius forma continebatur quod si nobis constaret quod ille qui tenet duas ecclesias karissimorum in Domino fratrum nostrorum abbatis et monachorum sancti Edmundi in villa que dicitur Colecestria ecclesiam videlicet sancte Trinitatis et ecclesiam que vocatur Byrdeskyrche eis solutam et constitutam pensionem ausu temeritatis subtraxit quam pro iam dictis ecclesiis ipse dicitur per aliquod tempus solvisse ei districtius in iungeremus ut retentam pensionem memorato abbati et fratribus sine diminutione restitueret et de solvendo nullam eis molestiam inferret vel gravamen si autem nobis obtemperare contempneret eum a prescriptis ecclesiis vestra freti auctoritate appellatione et occasione postposita removeremus ita quod liberum esset abbati et fratribus ad easdem ecclesias personam idoneam presentare que ipsis de temporalibus et diocesano de spiritualibus responderet Si vero uterque nostrum hiis interesse non posset alter nichilominus que predicta sunt maturius exequeretur Die igitur et loco congruo partibus semel et secundo constituto memoratus frater et coniudex noster abbas sancti Albani quod adesse non posset litteris ad nos transmissis competenter se excusavit Thomas autem qui dictorum ecclesiarum persona habebatur non venit nec responsalem sufficientem aut excusationem competentem pro se direxit Nos itaque prudentium qui aderant usi consilio quia idem Thomas per indevotionem et inobedientiam suam tam nos quam prenominatos fratres sancti Edmundi sumptibus et laboribus inaniter vexaverat et vestram nichilominus auctoritatem contempserat ipsum in expensis quas prefati fratres in primo et secundo itinere veniendi ad agendum fecerant condempnavimus novo remedio tergiversationibus que ex litigantium malitia frequenter in partibus nostris emergunt occurrere volentes Habito namque consilio et tractatu cum iurisperitis qua ratione citatorum auctoritate vestra ad iudicium et venire ante peremptorium edictum contempnentium desida seu contemptus posset puniri ipsos in expensis multandos duxerunt ne impune citationibus apostolica auctoritate factis supersedisse videantur Nisi enim eis pena pro contemptu infligeretur ex impunitate pro nichilo ducerent primam et secundam citationem contempnere et nos et actores incassum fatigare Cumque prefactus Thomas adhuc suam contempneret nobis exhibere presentiam ei qui vices agebat archidiaconi magistro scilicet Raymundo vestra et nostra iniunximus auctoritate ut predictas sequestraret ecclesias quam sequestrationem effectui se mancipasse idem Raymundus per litteras suas nobis significavit sed adiecit presbiterum quem interim nomine nostro ad ministrandum ibidem deputavit post aliquot dies suscepte administrationis per quendam fratrem iamdicti Thome nomine Willelmum ab administratione prohibitum et sic interruptam esse sequestrationem Postmodum vero cum prefatus Thomas in nostra consisteret presentia sepedictis monachis questionem adversus eum proponentibus in vocem appellationis quamvis in litteris commissionis appellatio esset inhibita prorupit contumaciter iudicium nostrum declinans Nos tamen sepedictos fratres sancti Edmundi in possessionem prescriptarum ecclesiarum causa custodie mittendos censuimus executionem venerabili fratri nostro Londoniensi episcopo in cuius iurisdictione ecclesie prescripte consistunt auctoritate nostra mandantes Quam cum ea qua decuit diligentia per officiales suos exequi pararet frater prenominati Thome tunc demum sepedictarum ecclesiarum se personam protestatus executoribus in facie manu armata ut dicebatur restitit et ne executio debitum sortiretur effectum vocem appellationis exhibuit Deinde domnum Londoniensem super hoc convenimus rogantes ut capitulo congregato diligentius inquireret an frater sepedicti Thome ante litem motam persona ecclesiarum illarum haberetur fraudem nimirum quam huic insertam negotio credebamus detegere affectantes Cumque domnus Londoniensis in pleno capitulo super prefati clerici personatu inquisitionem faceret ipse se personam supradictarum ecclesiarum Thoma fratre suo presente et non contradicente in diocesani presentia asseruit et cum diocesanus ab ipso Thoma quereret ut coram se fateretur an frater eius persona esset ipsarum ecclesiarum sicut ipse proponebat Thomas se plurimum super huiusmodi inquisitione gravatum asserens vestre magnitudinis presentiam appellavit data prosecutionis die octavas sancti Iohannis baptiste sicque nostra iurisdictio est delusa et fratrum sancti Edmundi iustitia suspensa Ne ergo pater sancte diutius huiusmodi malignantium perversitate in mandatorum vestrorum exercitatione fatigemur sub certa rescripti forma nos instruat vestra discretio utrum ex delegata nobis potestate an iudicis ordinarii officio sit eorum presumptio reprimenda qui nec ante litem motam super quacumque ecclesia aut possessione personas aut dominos se profitentur aut in comprovincialibus persone aut domini habeantur nec etiam lite mota adversus alium ius suum vel personatum cum tamen presentes vel scientes fuerint protestantur Verum cum tertius qui est in possessione contrarium calculum est reportaturus aut iam iudicio a possessione decidit tunc demum se personas seu dominos nominant et appellationis se tuentur obiectu ita quod in iudicio evicit in possessionem mitti non possit nec sententia auctoritate vestra pronuntiata debita valeat executione gaudere Valeat apostolatus vester in Domino semper pater sanctissime