Charter Document - 03360133

[H] illustri regi Anglorum duci Normannorum et Aquitanorum et comiti Andegavensium reverendissimo domino suo Iohannes Wigorn[ensis] ecclesie servus devotus salutem et obsequium Iuxta mandatum vestrum et Landavensis episcopi et abbatis sancti Vincentii compromissum Herefordensis episcopus et ego et abbas Persorensis Gloecum die statuto pariter convenimus cumque cum partibus presentes videlicet Landavensi episcopo et abbate sancti Vincentii diu de pace inter eos reformanda tractaremus nullamque pacis aditum inveniremus ad audiendam causam pariter consedimus Cumque pars utraque satis instructa in presenti appareret et abbas sancti Vincentii querelam suam et petitionem ordiretur clerici quidam Landavensis episcopi ecclesie quidem de qua erat controversia ut asserebant possessores ne in causa procederemus episcopum proprium Landavensem scilicet et abbatem sancti Vincentii ad sedem apostolicam appellaverunt Nos autem initia controversie attendentes videlicet quod Landavensis episcopus cum canonicis suis super ecclesia sancti Cadoci de Carleion tanquam super sede antiqua episcopatus sui principaliter adversus abbatem predictum quandoque ante presentiam domini legati quandoque ante presentiam vestram sepe litigium susceperat et tandem sub assensu vestro abbate etiam presente et consentiente per archidiaconum suum in nos compromiserat propter appellationem predictam a causa cognitione cessare noluimus unde Radulfus archidiaconus Landavensis pro episcopo suo ad inpediendam cognitionem nostram audientiam vestram appellavit et facta appellatione episcopus cum suis a presentia nostra statim discessit Cumque nec abbas Cenom neque nos ipsum revocare possemus instanter a nobis postulavit ipse abbas ut testes ipsius quos in iudicio super possessione sua iam tertio produxerat audiremus et si idonei essent suscipiemus ne tergiversationibus et subterfugiis adversariorum diu fatigatus ulterius in producendis testibus fatigaretur Inter nos autem diu conferentes de admittendis vel non admittendis testibus super admittendis pariter consensimus Cumque examinati et idonei inventi fuissent ad iuramentum propositis sacrosanctis euuangeliis eos provocavimus Quibus ad hoc paratis propter appellationem tertio contra nos iudices ad dominum papam factam a quodam clerico quem penitus ignorabamus et propter appellationem prius ad vos factam episcopus Herefordensis in probatione abbatis sancti Vincentii suscipienda tunc primo a me et ab abbate Persorensi discensit Ego vero et abbas Persorensis probationem abbatis sepedicti suscepimus tum quia super sola possessione fiebat tum quia iam tertio multis laboribus et sumptibus ipsius abbatis producta fuerat id vobis placere sentiebamus videlicet ut predictum abbatem in quibus iuste possemus exoneraremus restitutionem vero ipsius abbatis vobis deferentes quamvis ei de iure fieri debuisset ad audientiam vestram distulimus Que autem in presentia nostra acta sunt ex ordine sufficienter vobis retulimus ut ex actis mandato vestro finis imponatur agendis