Charter Document - 03360123
| Charter Number: | 03360123 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Information |
| Date: | 1151 - 1157 |
| Date type: | Assigned |
| Resource Link(s): |
|
Charter:
Venerabilibus et dilectis fratribus Hyl Cycestr et Roberto Lincoln Dei gratia episcopis Iohannes eadem gratia Wygorn[ensis] ecclesie minister salutem et dilectionem Veniens ante presentiam nostram senex quidam Thovi nomine in multorum audientia pupplice confessus est se a quibusdam circumventum adversus ecclesiam Glouc contra propriam conscientiam iurasse et cum postea egritudine laboraret inter cetera unde periculum anime sue iminebat iuramentum illud ad memoriam revocasse et quia in eo se graviter deliquisse intelligebat penitentia ductus in satisfactionem proprie culpe quam ex eodem iuramento contraxerat iterum spontanea voluntate iuravit quod in controversia que inter archiepiscopum Ebor et monachos Glouc agitatur numquam deinceps testimonium diceret neque in aliquo staret adversus predictam ecclesiam Deinde a quodam Aylwardo canonico sancti Oswaldi tertio iurare compulsus est quod secundo iuramento posthabito a primo non discederet immo Eborac archiepiscopo ad libitum et summonitionem ipsius adversus predictam ecclesiam testimonium perhiberet Eundem quoque Ailwardum xiiii sibi annorum penitentiam propter idem secundum iuramentum quod fecerat iniunxisse dicebat Nos autem ab ea pena velud extraordinaria penitus eum absolvimus consulentes ut medium iuramentum iuxta conscientie sue veritatem factum observaret et tertium iuramentum ab eo violenter extortum negligeret et in penam periurii in tertio iuramento commissi pena condigna eum oneravimus Huius itaque confessionis in presentia nostra multis audientibus in hunc modum facte seriem et veritatem vestre discretioni duximus intimandum quibus predicte cause cognitionem a domino papa delegatam esse cognovimus ut si quando predictus Tovi in testimonium adversus ecclesiam Glouc productus fuerit ex predictis quanta fides adhibenda sit eius testimonio attendatis Valeat []