Charter Document - 03360110
| Charter Number: | 03360110 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Announcement |
| Date: | 1149 - 1150 |
| Date type: | Assigned |
| Resource Link(s): |
|
Charter:
Symon Dei gratia Wigornensis episcopus omnibus sibi rite successuris et universis ecclesie matris filiis salutem et pontificalem benedictionem Dilecte fraternitati vestre presentibus apicibus intimamus nos percepto a spiritu consilii equo salubrique consilio sancte cui Dei gratia presidemus Wigornensi ecclesie Malverniam Parvam et ecclesiam sancti Egidii inibi sitam sicut illam que in feodo nostro initiata et ordine monastico ditata est in elemosinam eternaliter durabilem concessisse et dedisse et pontificali munimine confirmasse Decernimus itaque et communis utilitatis causa statuimus ut Wigornensis ecclesia cum Malvernensi et Malvernensis cum Wigornensi unius et indissolubilis ecclesie corpus efficiant et indissolubili unitatis et identitatis vinculo constringantur tam in cohabitatione monastica quam in professione Wigornensi ecclesie facienda Prohibemus etiam paci utrinque necessarie providendo ne aliquis in Parva Malvernia ad habitum monachicum inconsulto episcopo et priore et capitulo Wigorn admittatur sed eorum pari uoluntate fiat et benedictionibus suscipiatur Susceptum autem tam illum quam et omnes alios ibidem regulariter victitantes liceat priori Wigorn correctionis gratia Wigorniam transferre et alios ex Wigornensibus in eorum loco statuere Statuendus quoque prior Malvernie in capitulo Wigorn tanquam ex uno et eodem ecclesie corpore communiter eligatur quia qui unum sunt in corpore uno etiam debent spiritu communi profectui providere