Charter Document - 03360069
| Charter Number: | 03360069 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Arrangement |
| Date: | 1136 - 1150 |
| Date type: | Assigned |
| Resource Link(s): |
|
Charter:
S Dei gratia Wygorn[ensis] episcopus omnibus sancte matris ecclesie filiis salutem et orationes in Cristo Omnibus tam presentibus quam futuris cartule presentis testimonio notificamus nos dedicasse capellam sancti Audoeni de Glouc que est in Quedeleya derelicta atque inperpetuum deleta omni controversia et calumpnia sive querela a Turstino presbitero et sua parte retro habita Cui capelle Margareta mater Willelmi Parvi dedit iiii acras terre et totam decimam sui dominii tam in vivis quam in mortuis et hoc in manu mea misit et sic super altare per cultellum inde capellam dotavit Similiter et homines sui suas decimas omnes se singulis annis daturos concesserunt et super altare illud voverunt et sua manu vadiaverunt Nos autem ad perpetuam ipsius capelle pacem integre conservandam concessimus Willelmo filio predicte domine in elemosinam omnes predictas decimas et exitus elemosinarum terre matris sue et eum inde personavimus Sed et canonici sancti Audoeni Ricardus videlicet et Rogerus concesserunt quod vicarius eorum qui predicte capelle deserviret faceret fidelitatem predicto Willelmo de sua parte sicut predictis canonicis de sua quam antea habebant et Willelmus debebat adquietare vicarium pro servitio sue partis Nos vero ex auctoritate a Deo nobis iniuncta hanc considerationem concessimus et presentibus apicibus confirmavimus et pro pace et utilitate sancte ecclesie et salute tam vivorum quam mortuorum concessimus predictam capellam habere consuetudinem capelle de episcopalibus cum cimiterio suo inperpetuum Testibus magistro Clemente et Iohanne canonicis regularibus Ricardo et Rogero sancti Audoeni canonicis Edwardo sancti Oswaldi canonico Osberto capellano meo Rogero filio Fulconis et multis aliis